III. De giter marcheandise en eau por péril eschever.

§ 1.

De marchandie menée par iau gitée por charge, l'en doit avoir reson de giter marchandise en eau ; car se li metres de la nef charge trop la nef, et por ce convient la marchandie giter, et la cope en est soe et li domages ; ou se li marinier ne sont sofisant, et por ce périsse li avoirs.

Mès se torment sort por quoi il conviegne l'avoir giter en la mer, ou la nef peçoie d'avointure que l'en ne put eschiver, li marcheanz est tenuz.

§ 2.

Or gardon comment li metres de la nef sera tenuz : et s'il dit que sa chose soit périe, se c'est par peceure, la peceure sera veue par prodes omes, ou presanz qu'il sera peceaie, et por ces prodes omes. Et por les compoignons de la nef, por ce qu'il jurront, ne seront creu. Et s'ele est effundée do tot, iloc ne convient point de prove, fors le parent. Et se l'en a geté l'avoir en l'eau por le péril de tempeste, l'en en sera creuz par les seremanz au compoignons de la nef, et par le tesmoing [p. 161] dou païs, qu'à celi jor ot tempeste en cele contrée ; quar en tel chose n'a point de gage.