§ 1.

Li rois dit en son conseil : Nos avons sovent plez de quoi une question est née qui nos avient sovant ; et por ce que nos savons que plusors tex choses avienent sovent, il en semblent qui estoit bien mester que nos feissiens une loi propre à savoir le droit des choses qui sont baillies en garde.

§ 2.

Comme un ons meist ses deners en un moster, en une uiche qu'il aporta, uns clers embla ces deniers, et s'enfoï. Cil hom demande ses deners à l'abé et au convent de ce moter. A ce respondi li abés et li convenz qu'il n'en voloit nus rendre, comme li dener n'avoient pas esté baillié espéciaument, mès en l'iglise avoit mise cele chose, et aus avoient mis diligence de prodome en garder l'iglise. Don l'en demende qu'en dit droiz. Et l'en dit que l'iglise n'i est pas tenue, et que l'en doit querre le clerc, et s'il est trovez, qu'il soit forciez de rendre les deniers.

Ci a bone devise, comme chose est mise ou chiés clerc ou en yglise, l'en doit demender la chose à la personne, non pas à l'iglise, se ce n'est torné en preu de l'iglise : lors est tenue l'iglise de ce qu'el en a eu, tot ne soit la chose mise en l'iglyse. Et quant la chose est mise en [p. 165] l'iglyse, pardevant les prélaz de l'iglyse, lors la doit l'en demender à l'yglise. Et l'en doit maumener celi chés qui l'en a mise la chose en garde qu'il la rende.

§ 3.

Aucun mist sa chose en ma meson, ge la perdi ; mès la moie fust bien gardée ; et l'en dist que, tot doie l'en cuider que j'eie la chose bien gardée que l'en me bailla à garder, en ce quas a présumpcion qu'il ne l'et pas bien gardée.

Mès posé que je te baille une chose à garder por estre sauve, ou tu eus loer por la chose garder, se la garde n'empire par tes copes, tu n'i es pas tenuz, fors en tres quas : que se tu as convent que s'ele est perdue que tu la li rendras ; ou quant ta cope ala avant le quas ; ou quant la chose demora à rendre.

Posé soit que aucun eist mise sa chose chés toi jusque à la Saint-Guérin, la porra-il demender avant le terme ? et l'en dit que oïl, posé encore que cil qui te baille sa chose à garder estoit tenuz à toi de rendre aucuns deniers por la chose garder, tu ne veauz pas la chose rendre jusque tu eis ta promesse : l'en dit que tu puez bien ce fere, que bone foi ne soit tornée à tricherie, que l'en ne te toille ce que tu as déservi.

Et se aucuns reçoit or ou autres choses en garde par aucune condicion, cil qui a la chose en garde doit la chose rendre, quant la condition est acomplie, ne nus n'oit congié de deffendre contre ce, que la chose que fu baillie en garde ne soit rendue ; car plusors priviléges en sont donées par le feseor de lois, et par nos-meismes ès choses baillies en garde.

Et s'il avient que la chose que estoit baillie en garde soit perdue, ou périe par quas d'aventure que l'en ne pot eschever, la perte soit sor celi qui la chose est, se la chose ne demora à rendre par celi qui la gardoit. L'en commende que plus soit estroitement commendé la chose rendre à celi qui la garde, qu'ele ne soit juigée à perdue à celi qui la bailla à garder, por ce que li gardeor des choses n'aient acheson de fere tricherie, ne desloïauté ; car o tot ce ne se gardent-il pas.