II. De la loi Rodiane de geter marcheandise en mer [rubr.]

L’an garde en la loi Rodienne de giet : quant l’en veaut geter en la mer por alegier la nef, ce qu’est geté por le salu de toz doit estre restoré de toz ces qui sont en la nef.

Quant arbre ou estrumant de nef est geté por achever le peril, chascun doit metre do son.

Se aucunne merz sont tregetees en chalan por legier la nef chargie, qu’i ne poent venir à port que elle ne perillat, et ce chalain tumbe à l’entree dou port, cil qui sont en la nef et ont lor marchandies sauves doivent doner do lor à emender le domage qui est avenu en chelein, autresi comme s’il en eust fet giet ; et Sabinus dit que c’est voir. Encontre, se la hoe est sauvee ou une partie des marchendies et la nef perist, cil qui perdirent en la nef ne doivent rien emender ; car se la nef est sauvee le giet vient en commun. ¶ {1} Et se la nef, qui est tempestee, est alegie de giet de merz à un marcheant, est [73rB] noee en autre leu, et notoners treent les merz à aucuns marcheanz, se li loer est rendu, cil doit avoir reson de ses choses qui furent getees por la nef legier par ceus qui orent lor choses sauves par les notoniers. Sabinus dist que cil qui orent lor choses sauves ne doivent rien rendre à celi qui fist le giet se aucunnes choses de lor merz furent tretes por les noteniers ; quar il n’est pas veu que la merz fust getee por la nef garder, qui perist. ¶ {2} Quant getoiz de merz est fez, et les1 choses à aucun, qui remetret en la nef sunt enpirees, l’en doit veoir s’i doit metre en la communauté, comme il ne doivet pas avoir doble domage. Mes l’en doit dire que cesti doit communauter por le pris des choses presentes ; ausi com se la merz à .ii. i sont, et les choses à l’un sont arosees de eau, cil qui a ses choses sauves metra en la communauté dusqu’à .xx. et cestui dusque à .x. Et nos poon deviser de quoi ces choses sont enpirees ; ou por la giez ou por ce que les choses furent descouvertes vint li domages ; ou por autre cause, por ce que la merz gesoet allors en un autre angle et l’eau entra ; lors devroit il acommunauter. Ou il n’acommunautera mie por la premiere cause por ce que il perdi ou giet ? Et se les choses sont enpirees de l’eau por le giet ? Et s’il i a plus sotive divise, que sera s’il a plus de domage en communauter que un giet ? Ausi com s’il i avoit .xx. fardiaus et la communauté .x. et li domages vaut .ii. ; hors ce que il i a eu do domage, il doit acommunauter le remanant. Que sera s’e plus de domage qu’en la communauté, ausi comme les choses sont enpirees vaillant .x. mars et la communauté .ii. ? En ceste dotance il ne doit pas porter lou fes et2 l’autre. Or veon si li convient acommunauter. Que sera se je perz mes choses qui sont gitees ou s’i sont enpirees par ce que furent descouertes ? Car ausi comme l’en aide à celi qui a perdu, ausi doit l’en aidier à celi qui a ses choses en[73vA]pirees por le giet ; et issit le dit Papinian.

Domage de nef perdue n’est pas recovré par compoignie de communauté par ceus qui delivrent lor choses quant la nef froissa ; car l’en s’acorde à ce quant la nef est sauvee au commun peril par le remede do giet. {1} Se li arbres de la nef est tranchiez por delivrer la nef et la marchandie, il convendra que chascun mete sa serve.

Cum la nef fust getee par tempeste, ce que chascun puet sauver à son os, comme de feu, il fut son.

Cil qui gitet aucunnes choses por la nef legier ne les gitet mie par tel corage que il lasoient guerpies ; et s’i la trovent, i les anporterunt3 ; et si sevent où i·ssunt getees, et la requerrunt. Et seront autresi comme celi qui est trop chargiez qui lesse la chose en mi la voie et puis retorne por aporter la.

Voluistius manda à Paulus tex paroles : por ce que tu aloas sers, l’en ne te doit pas voiture por celui qui est morz en la nef. Paulus demande se l’en doit doner loier por ceus qui sont mis en la nef ou por ceus qui sont envoié en essil ; et se ce n’est aparissant, il sofira au notoner s’il pot prover que li serf fust mis en la nef. ¶ {1} Se tu as la nef aloe por tel condicion que tes merz i fussent portees, et li noteniers mist ces merz sanz besoing en une mauvese nef, comme il seust bien que tu no voloies pas, et l’aver perist, et por cele nef où ele fust mise darrenierement, tu as aucion contre le notonier do loage. Paulus dit : plus que se l’une nef et l’autre perist en cele voie, et ce fust fet sanz la trechierie à notonier. Autel droit avra cil se li noteniers fust retenuz et l’en li deffendi que il ne portast cele marchandie. Et autel droit avra cil s’il fist tel convenant à toi que il te rendist une poine ; si ne t’avoit portees tes marchandies ou leu où tu li dois au terme [73vB] que tu li metoies, il doit la poine. Et ausi diron nos se li notonniers est destorbez de maladie que il ne puisse nagier. Et ausi diron nos se la nef est mauvese sanz son barat et sanz sa cope. ¶ {2} Se tu aloas une nef à mestre .ii. mil de bues et tu les i portas, tu doiz le pris des .ii. mil. Paulus. Si in adversionem. Et se la nef est aloie en tempeste, li loers est deu por .ii. mil. Se le marchié est issi fet, encontre tu doiz le loier por tant des bues comme tu i portas.