V. [74vB] De aucion tributoire, c’est ce aucion par quoi l’en rent [rubr.]

Li preu de ce ban est moult grant por le seignor qui aucunne foiz a preu en marchiez son serf, qui n’est tenuz solement que do chetel qui est hesmé hors ce que il doit au seignor. Mes se il set que li serf soit marcheanz de son chetel, ausi comme estrange marcheant, il est tenuz de ceste aucion à rendre au seignor le gaing. {1} Tot soit « marchandie » estroite, qui ne s’estant pas à serf, à folons, à coturiés, à toissiers, à serpiers, mes Pedius dit que totes marcheandises apartienent à ce ban. ¶ {2} Mes marcheandise de ce que li serf a n’est ansi comme nos apelons son chetel, hors ce que il doit au seignor ; et se ce serf n’a rien, li sires est tenuz se cil moine marcheandie par son sen. ¶ {3} Nos entendon savoir quant il é viot ; et je n’entent pas volenté, mes soffrance. Et li sires ne le doit pas voloir ; et s’il le set et il ne le contredit, il sera tenuz de ceste aucion [75rA]. ¶ {4} Parole de poier est entendue à homes et à femes ¶ et à toz cex qui ne sont en autrui poer. ¶ {5} Et ceste auccion n’apartient pas solement à sers, qui à cez qui nos servent en bone foi, soient franc, soient sers à autrui ou à cex en qui nos avon nostre usage.

Et se le serf est commun et li .ii. seignor le sevent, l’en avra contre l’un et l’autre aucion. Et se l’un le set et l’autre non, l’en avra auction contre celi qui le set ; mes ce sera oté que l’en doit à celi que rien n’en set. Et se aucun tret en plet celi qui rien n’en siet por ce que il est trez en plet dou chetel au serf, ce que l’en doit à celi qui ne le sot sera osté et sera tenuz de tot ; car se cil qui le sot est trez en plet il metra hors ce que l’en li doit, et issi le dit Julien. ¶ {1} Se serf à orfelin ou à forsené est marcheanz de marcheandise de son chetel, li barat au tutor ou au curator ne nuira pas à l’orfelin ne à forsené, ne il ne i doivent rien gaigner ; et neporquant, se li orfelin a rien eu par le barat au tutor, il est tenuz de ceste aucion. Et ausi di ge de celui qui est forsené, ja soit ce que Ponponius dit que li orfelin est tenuz do barat au tutot s’il a de quoi paier ; et il sera tenuz de tant que il donge l’aucion que il a contre le tutor. {2} Et se c’est fet par le barat au tutor, s’il est de tel aage que il sache que est barat, il est tenuz, tot ne soufise son savoer à mener la marcheandise. Et que sera donques par foi ? Le savoir au tutor ou au curator fera leu à ceste auction ; et g’ei desus monstré comment nuira le barat.

Aucun plede encontre le seignor ou non de serf solement do chetel, un autre de ceste aucion ; l’en demande se li sires doit metre hors de chetel ce que il doit rendre à celi qui plede de ceste auction. Il dit que lors pot l’en pledier de ceste auction quant li sires ne veaut fere gré par le ban au prevost de departir le pris de la marchendie, c’est à dire quant il met hors la greignor partie de sa dete que il rendi à ses creanciers ; ausi comme se la marcerie se monta .xxx. livres dont il en avoit creu [75rB] .xv. et .ii. estranges .xxx., il mist hors toz les .xv. et rendi aus creanciers les autres .xv. quant n’en dut metre hors que .x. et rendre .x. es astranges. Quant il fist ce, l’en entant ce que il ne se delivra pas do serf, par ce1 que il en doit encor .xv. en non de celi par ceste aucion ; par quoi, s’il commande pledier do chetel que il estoit par aventure hors de la mercerie, il metra hors .xv. comme cil qui est creancier au serf.