le logo Elec

L’année 1437 dans la pratique de Pierre Christofle, notaire du Châtelet d’Orléans

129 v°Et le lundi XXVIIIe jour d’octobre IIIIc XXXVII.

Jehan Soichet l’ainsnel et Guillot Soichet le jeune, freres, en leurs noms privez et aussi ledit Jehan Soichet ou nom et comme curateur de Simonne, fille feux Jaquet Soichet et de feue 130 r° Jehannete jadis sa femme, comme par lettres de cure huy faictes et passees soubz le seel aux causes de la presvosté d’Orleans nous est apparu, les dessus nommez freres et seur et aussi heritiers en partie desdit feux Jaquet Soichet et de ladicte Jehannete, leur pere et mere, parroissiens de Saint Hillaire Saint Mesmin lez Orleans, confessent esdiz noms avoir vendu et transporté pour touz jours a Jehan le Mestas, parroissien dudit Saint Hillaire Saint Mesmin, pour lui, ses hoirs etc. la moittié et tout tel droit comme aux dessus nommez vendeurs peut competter et appartenir en une maison couverte de tieulle ainsi comme elle se comporte et poursuit, que les dessusdiz vendeurs disoient a eulx appartenir et avoir de leur propre heritaige assise et seant en ladicte parroisse Saint Hillaire Saint Mesmin, partissant avec Pierre Chastellain et ledit Jehan le Mestas qui a cause de leurs femmes y ont le seurplus, tenant aux hoirs et heritiers de feux Hubert Hodoin, jadis boulengier d’Orleans, d’une part et a Jehan Lescuier d’autre part, chargee toute icelle maison de douze deniers parisis de cens deuz chacun an le jour de la Sainte Croix en may envers Pierre Compaing bourgois d’Orleans pour toutes charges quelxconques. Ceste vente faicte pour le pris et somme de neuf livres tournois, monnoie courant a present, paiee, c’est assavoir en presence IIII livres XV solz tournois. Et du seurplus se tindrent contans. Quittent etc. Dessaisy etc. Saisy etc. Promettent garentir. Obligent etc.

Dans la marge gauche : f.