I. De la juridiction de toz juiges.
§ 1.
Et li segonz livres. — L'office à celi qui a juridiction est trop let (latissimum), car il puet doner la seisine des biens et metre en saissine, et puet doner tutors as orfelins, qui point n'en ont, et doner juges à cels qui pleidient ensemble. — Tout ce est otroié à celi à qui l'en done juridiction, sanz quoi l'en ne puet la juridiction desenvoloper1.
§ 2.
Commendement est pur ou maulé. Commandemant est pur, quant l'en a poer de glaive à punir les mauvès homes ; et ce apele l'en poer. Li commendemanz est mauslez là où il a juridiction dedanz. Juridiction est poer de doner juge2.
§ 3.
Issint le commandèrent li grant seignor, que cil poet mander juridiction qui l'a por son droit, non pas por autre bénéfice. Et se cil qui mende la juridiction muert avant que la chose soit commencée, devant celui à qui l'en l'a mandé, Jehan de Beaumont dit que li mendement est nul3.
§ 4.
Se aucun corrump ou dépièce par sa tricherie ce qu'est atabli par bons princes, ou par chartre, ou par durable juridiction, ou par [p. 76] autre matère, il li det coter ; et an cest banc sont contenu serf, et mesnie, et femes. Et andemantres que tex juridiction est escrite, ou avant, ou aucun viant qui la dépièce, li bans ne les paroles qui i ssunt ne serunt pas tenues. Et Geufroi de la Chapele dit que c'est reisons. — Et si li serf la dépiècent, et celx qui sont poure, se lor seignors ne's en défendent, il seront tormenté. Et por ce fait l'en mencion de male trecherie : et se aucuns la dépièce par niceté, ou par vilenie, ou se sa jotice le li commende, en tex choses il n'est pas tenuz. Et se cil qui dépièce le droit ou ses mains, ou commende à un autre qu'il le dépièce, andui i sont tenu ; et se li uns le mande par conchiement, et li autres le fit sen (sans) conchiement, li conchierres i est tenuz, et l'autre non. Et se l'un et l'autre le font par conchiemant, andui i sont tenu4. — Il ne soffira pas que l'un en port la paine ; mais li dui l'en porteront, et le penoirront. — Se la mesnie à aucun conchie la juridiction, et li sires le pout deffendre, et ne le deffende, il n'i sont pas sostenu ; mès li sires l'amendera an non d'aus, et li autre plusors foiz : ausint com si plusors font injures, ou font domages, por ce qu'il i a plusors fez, li uns n'est pas solemant tenuz, mès tuit. — Mès se aucuns soz fist conchiement, que la juridictions fust dépecée ou corrumpue, lor il n'i a que un consel, ne n'i apert mie plusors foiz : et Renauz de Triecot le dit issit5.
§ 5.
Cil qui a juridiction ne doit pas fere droit de soi, ne de sa feme, ne de son fiz qui est en son poer : quar plus tost sera esmeuz de fere mauvestié en sa querele que en l'autrui forfet, aceuté (excepté) le roi, que pot quenoistre de tot. — Se aucuns d'aucune juridiction ait contre un autre de pluisors demendes, dun chascune apartiene à la juridiction, et il n'i ait pas tant demandes que al et (elle ait) passé mesure, cil qui à la juridiction sera en porra quenoitre ; et se l'uns fet demende contre l'autre, et li uns demande meins et li autre plus, et il ne saient plus d'une jotice, li uns respondra à l'autre. Et toutes demandes sunt ci contenues, fors d'éritage, com mesons, vignes, terres, molins, et asés autres choses. — Se une demande est commune à plusors personnes, [p. 77] ausit com de partir héritage, ou de partir choses communes, ou de bones metre, l'en doit veoir se la partie à chascun de cels qui demende, se ele est de cele juridiction : et issit le commende l'en, que l'en ne tiegne droit de ce don l'en n'est pas juges6.
§ 6.
Nus ne puet tormenter son serf sanz cause ; mès il le puet bien châteier atempréement.
§ 7.
Il convient que cil soit apelez juges qui est en aucun poer ; si com l'en fet meors, serganz, prévolz, baillis, et autres qui governent le pueple.
§ 8.
Nus ne doit commender jugier à celi jor qu'il pert sa baillie.
§ 9.
Droit otroie, et nos usons de celi droit, que se aucun qui a vingt et un an ou anviron, se met en juridiction, l'en li porra dire droit contre li7.
§ 10.
Se l'en vait par airor à un prévost por autre, ne vaudra riens quanquez l'en fera devant lui : car cil ne sera pas oïz qui dira que les parties s'i saient consenties en li, et qu'il n'antendoient pas à consentir. Jehan de Beaumont dit que cil ne consint pas qui foloie, quar tel chose est plus contraire à consentement que à error, qui descuevre la niceté8.
§ 11.
Li prévoz puet mender sa juridicion, ou tout, ou une pièce : car cil à qui la juridicion est mandée n'use pas de sa juridicion, mès de cele à celi qui la li mande. Ausint com li baillis ou li prévoz puet mander sa juridiction tote, ausi en puet-il mander partie. — Se convenanz est que autres prévolz que cil qui an la juridiction est, die droit, et avant que l'en auge devant li, est meuée la volenté sanz dotance, nus ne doit estre forcez de tenir ces convenances9.
§ 12.
Nus ne puet fere pez sanz jotice, por qu'il i ait clamor, et por que il i ait chose où il i ait à amender ; que cil qui a la juridiction n'i ait amende.
§ 13.
Come une pucele fust en plet devant son juge, ele fu condempnée ; ele se maria emprès à un home qui estoit d'autrui juridiction. L'en demendoit se cil porroit fere tenir la sentence au premier juge ? et je [p. 78] di que oïl : quar la sentence qui est donée dou premier juge est droite, et en toz quas doit l'en ce garder généraument. —
§ 14.
Cil qui est hors dou poer au juge, si ne fet ce qu'il commende, n'est pas puniz, ausit com s'il vousit plus croître sa juridiction qu'ele n'estoit d'avant10.
