École des chartes » ELEC » LI SEGONZ LIVRES » XIX. D'avocaz.
[p. 102]

XIX. D'avocaz.

§ 1.

L'en dit que clerc ordenez de sainte ordenes, s'il sunt bienficiez en sainte yglise, ne puent estre avoquaz en cort laye, que por aus, ou por yglise1.

§ 2.

Enten que clers qui sont en saintes ordres, ou en menors, ne puent estre avocaz en cort laie.

§ 3.

Come chanoine rielé se fussent pris à estre avoquaz en cort laie, l'en dit que ne puent ce fere, que por lor yglise ; et convient que lor abé lor commant. Et il respondoient que li canon qui ce disoient parloient de moines, non pas de chanoines. Et le pape dit que ausit doit l'en garder de chanoines relez com de moines, tot die li canons des moines2.

§ 4.

Enten que moine et chanoine sont osté d'estre avoquaz ; et moines ne puet plaidier por le preu de son moster, quant li aferes est atanduz à autre.

§ 5.

Cil chapitres3 est devisés en trois parties. En la premère partie, parole l'en des prestres ; en la seconde, des clerc, et des menors ordres. Et dient que li clerc ne deivent pas estre avoquaz en cort laye, que por aus ou por lor yglise, et por lor parenz ou por poures, ne ne doit estre avoquaz en cause de sanc, ne por chose qui atoche à mort d'ome [p. 103] Ausit dit l'en de procurator. En la seconde (tierce) part, dit l'en que, se aucuns a bienfice, et il vet encontre ce, il doit perdre le bienfice.

§ 6.

Enten que aucuns doit perdre le bienfice, quant il n'est recors dou bienfet que l'en li a fet.

§ 7.

Emprès l'en dit : couvers (cuvert ?) ne puet estre avoquaz, se n'est par le congié son segnor ; ne non aagé, se n'est par le commendemant au juge et à son tutor ; ne fame ne orp, por ce qu'il ne puet voir la autece dou juge, ne nul qui soit queneu estre dampnez de fez don l'en doit estre livrez à mort, tout soit-il respitez par pitié ; ne vaincu. Et cil sont osté d'estre avoquaz4.


1 Decret. Greg. IX, lib. 1, tit. 37, c. 1 : de Postulando.
2 Ibid., c. 2.
3 Ibid., c. 3.
4 Dig., lib. 3, tit. 1, frag. 1, de Postulando.