VII. De celi qui plévist que aucuns vindra a jor.
§ 1.
Cil qui plévist por moi que ge vendrai au jor, est tenuz de moi avoir au jor. Et se aucuns promist sanz doner caution de li avoir au jor, il le doit avoir au jor.
§ 2.
Aucuns quidièrent que l'en ne puisse nus de sa meson trere en plet, parce que sa meson est à chascun segnor refuige, et qui nul en tret [p. 84] d'iqui, il est légière chose qui li fet force. Asés a peine celi qui n'a que le deffende, ne que paer qui se repont ; et certaine chose est qui met son aversaire en saisine de ses biens. Et se l'en le trueuve en aucun certain leu, bien le puet l'en pleidier.
§ 3.
L'en ne puet trere en plet cels qui ovrent en vigne, ne qui se beignent, ne qui sont en moutiers. Et cil qui est en sa meison puet estre semons.
§ 4.
Mès l'en ne le doit pas traire de sa meison. Et ce l'en otroie à cels qui n'ont pas fet chose par quoi lor cors périsse.
§ 5.
L'en ne puet semondre celx qui n'ont quatorze anz, ne puceles qui sont en autrui garde1.
§ 6.
Cil qui est semons en droit, doit estre leissiez en deus quas : li uns est, s'il a essoine et il i anvoit soufisant qui le défande ; ou se, demantres qu'il i vient, fet pès, sauve la droiture au seignor2.
§ 7.
Se aucuns est semons, et donge plège d'étier (d'ester) à droit, et cil plèges n'ait de quoi paier, autant vaut comme s'il n'en avoit unques point doné. En quelque menière que aucuns soit semons devant le prévost, ou devant le baillif, il i doit venir por alléguier son privilège, s'il a, por soi deffendre.
§ 8.
Se aucuns est trez en plet de son juge, et il n'i vet, li juges le punira segont raison, por le despit de la juridiction : car l'en doit fere espenoir as fos lor folie. Et s'il ne vaut riens au demendeor à avoir tret son aversaire en plet, la poine est sor lui3.
§ 9.
Se aucuns promet en cort qu'il aura acun à droit, si n'i a mise peine, s'il n'i viant, l'en ne li siet que demander : et issit le dit Jehan de Beaumont. Mès le domage que l'en i a puet l'en demander4.
