École des chartes » ELEC » LI SEGONZ LIVRES » XIII. De délaiz.
[p. 96]

XIII. De délaiz.

§ 1.

Li rois commenda que nus ne fust forchiez de venir à cort en tens qu'il mestive, ne en tens qu'il vendegne, porce que les biens dont il ont la cure ne périssent. Et se li prévolz les i apèle, et il ne vienent par lor gré, il i doivent venir ; mès il n'i respondront mie, se n'est par lor gré. Et s'il done sentence estre (outre) lor gré, la sentence tendra, se ele n'est apelée par rapel ; mès por rapel puet estre rapelée1.

§ 2.

Mès il i a certaines persones que l'en puet forcier à venir à cort, si comme la chose don est li contenz puet périr par la loi de venir à cort. Car totes les foiz que mester est, nos devons aler à cort et respondre, quant il n'i a péril de l'aler et dou respondre ; et issit le commende li rois.

§ 3.

Et se li un et li autre, emprès ce que li plez fust entammez, ne veaut plédier, li rois lor donne délai2.

§ 4.

Car autel reson fist li rois, et commende que l'en en doit ausi user à jor de foiriez : si comme si l'en doit doner tutor ou curator à aucun, barre de la loi n'i vaut riens, por le péril des enfanz ; ou se aucuns est morz, por metre sa feme en saisine de doère, barre de la loi [p. 97] n'i vaut riens ; et d'ovrir testament. Au tens de aoust ou de vendenges, doit l'en fere droit des choses qui sont en péril, ausi comme de larecin, de domages et de injure ; et de granz injures, si comme de sanc ; et de ce que l'en ravist de arson, de trébuchéiz et de froiseure, de nef prise ; et de murtre, de rat, de traïson, d'omecide, de membre tolu, de jugement de franchise, de celui qui prent les choses dou commun profit3.

§ 5.

L'en tient tens de venenges, quant l'en venenge ; et tens de mestive, quant l'en mestive4.

§ 6.

Li rois deffent que l'en ne juge à jor de foirie, se les parties ne s'i acordent ; mès por la grâce à celx qui pleident ensemble, quant il i a por quoi, l'en le doit fere. Et se aucuns a estrument où il ait péril de montré le par délai, l'en le doit montrer en tel tens. Segont la costume de France en l'ostel le roi, li jorz commence à solel levant, et dure jusque soleil est cochanz ; et as assises ausint ; et as autres menuz plez de prévôtez, et as autres seignories, jusque miedi en avant, si se deffent5.


1 Ibid., tit. 12, frag. 1 : De ferüs et dilationibus.
2 Ibid., frag. 1, § 2.
3 Dig., lib. 2, tit. 12, frag. 2, 3.
4 Ibid., frag. 4.
5 Ibid., frag. 6, 7, 8.