X. Qui sunt forcié de doner plège.
§ 1.
[p. 87] Qui sunt forcé de doner plège, ou de jurer, ou de prometre que cil por qui il i vienent, vendront à jor.
§ 2.
Autant fet satisfacion comme fere gré. Quar ausi comme nos feisons gré à celui à qui nos feisons son desirrier, ausi fesons-nos à son aversaire, quant nos le fesons segur de ce, por plège, qu'il nos demende1.
§ 3.
Uns borgois qui done plège d'aucun à fere venir à jor, doit l'en doner riche, c'est à entendre que l'en puisse légièrement nanter ou trere en plet.
§ 4.
Se aucuns done plège de venir au jour à tex persones qui n'ont poer de riens demender, la plévine n'est mie. Le filz puet estre plège por le père, tout soit-il à autrui2.
§ 5.
Li rois done demende contre le plège qui promist que aucun vendroit à jor, de tant comme la chose vaut ; et mius vaut que li plèges soit tenus de tant com la chose se monte, s'il ne s'oblige por certaine chose.
§ 6.
Se la demende est tele qu'ele vaille deus, ou trois, ou quatre, Jehan de Beaumont dit que li plèges est tenuz de tant com la chose vaut3.
§ 7.
Se cil muert qui done plège de venir à jor, li prévoz ne doit pas commender que cil iviegne ; et s'il le fet, et ne le sache qu'il soit mort, la demende doit remaindre ; et s'il muert emprès le jor qui dut venir, ou soit forbenis de la cité, la demende porra bien estre fete4.
§ 8.
Se aucuns plévist por aucuns condamné et li condempnez muire ou soit forbeniz de la cité, l'en fera sa demende contre le plège que l'en siet bien, jà por ce ne remaindra.
§ 9.
Qui ne voudra recevoir plège que l'en siet bien que bien puet paier la chose, et ne le voudra recevoir por autre venir à jor, li refusez plège se puet pleindre de celui qui le refuse : car ce n'est mie que l'en [p. 88] ne voie injure, et viaut l'en celi détraire en cause qui veaut doner bon plège ; et le plège que l'en ne veaut recevoir se puet plaindre ausint comme de tort que l'en li a fet.
§ 10.
A totes les foiz que l'en plévist ou l'en fet gré en mauvèse menière, l'en n'i a plévi ne fet grié5.
§ 11.
Geufroi de la Chapele dit que l'en puet bien prandre juge en plèges, et puet bien refuser le juge, se l'en viaut. L'en doit garder qu'en die droit ? et l'en dit que le demendeor le doit refuser. Et se l'en ne puet avoir autrement pleige, l'en li doit dire qu'il n'usera pas de son privilége, et il doit ce otroier.
§ 12.
Se plévine est nécessaire, et cil à qui l'en demende ne la puet pas doner légièrement, l'en doit voir là où il est semons, s'il puet doner plège en une autre cité de la province. Et se aucuns plévist par sa volenté, l'en ne l'envoira pas en autre leu por doner plège, ne cil qui par besoing s'otroie à doner plège n'i gaaigne riens ne n'i pert.
§ 13.
Se l'en ne done pas plège por meubles, et la persone soit sopeceneuse, que l'en viut que l'en done plège, il le doit doner devant le juge, s'il plest au juge, jusque il ait fet gré, ou que li plez soit achevez6.
§ 14.
Renaut de Triecot dit : Cil qui pleidoient ensemble se doivent acorder de metre jor ; et s'il ne s'i acordent, li juges li doit metre sufisanment, et doit atremper et de çà et de là l'afere.
§ 15.
Qui done feme en plège sanz le seu au seignor, ne done nul plège ; ne enfant non aagé, se n'est par l'autorité à celui qui le doit garder ; ne desvé ne doit estre plège. Et se l'en demende au mari chose qui soit dou doaire sa feme, la feme porra estre plège en sa chose.
§ 16.
Se aucuns serf vient avant, qui pléyisse sanz le congié son seignor, la plévine est nule ; et se li sires le siet, ou s'i consient, la plévine vaut. Et à celi qui n'a quinze anz passez doit l'en aidier, et à feme por sa niceté7.
§ 17.
Se li plège devient eir à celui qui le mist en plège, ou celui qui le mist en plèges à lui, il doit rendre la caucion.
§ 18.
Se tutor et curator plévissent la chose à l'orfelin estre sauve, [p. 89] il doivent estre seisi de la chose : quar il convient qu'il plévissent à rendre la propriété et les fruiz.
§ 19.
Gagez (le gagez) doit doner plège de randre le lés, quant li juges voit qu'il en est mesters. Li er meismes doit doner plège qu'il fera gré dou lés ; et s'il ne le fet, il sera dessessiz de la chose. Et se le gagiez ne puet doner plège de rendre le lés, li eir doit requerre qu'il ait la sesine, en donant plège de rendre le lés : si que non, la chose sera mise en sauve mein par le juge. — Se le gagiez est mis en saisene del lés par les juges, sanz trecherie et sanz cope, l'en ne le puet plédier8.
§ 20.
Et cil qui ne puet doner plège à Orliens, le doit jurer ; et qui le puet doner à Paris, ne jurra pas qu'il ne le puet doner allors ; mès il jurra qu'il ne le fet par barat ne par conchiement : et issit ne le puet l'en forcer. Et se aucuns a convent de donner plège en un leu, et il le done allors, il ne le prendra pas, s'il ne veaut.
§ 21.
Se li baillif done arbitre à enquerre qui sont plège de aucune cause, se les parties voent qu'il dient son arbitre malement por son dit, il en puent apeler ausint comme de juges9.
§ 22.
Se arbitre dit que li plège sont bon et bien rendant, l'en les i doit tenir, com cele querele puist estre portée à un autre bon juge par apel. Et qui dit chose por quoi li plège ne valent riens, ce que li arbitres dit que li plège estoent bon, bien se gart, s'il a pris icés à sa volenté, il s'en doit tenir apaiez.
§ 23.
Et se mésaventure avient as plèges andementres, ou de povreté, ou de aucune autre chose, se l'en siet qu'il soit issit, il convindra que l'en doint autres plèges10.
§ 24.
Geufroi de la Chapele dit : Se ge te mandai que tu demandasses une tenure por moi, et tu en preis plège, et anprès la fès demender par mon commendement, li plège que tu as pris en sont tenu vers moi.
§ 25.
Acordé est de toz que li eir tindra le éritage par conduction, c'est à entendre à rendre ce dont ele est chargie, et doit doner plège de l'éritage ou dou fez ; et quant la conduction faut, la plévine faut. Et [p. 90] se pluisors sont atablir (établis) commun, se l'en plévist, l'en plévist por toz11.
§ 26.
Se filz défant son père qui est hors dou païs, ge demans s'il doit donner plège de rendre ce que l'en jugera ? et G. dit que celui qui deffent celi qui n'est pas présenz, tout soit-il fiz ou père, est tenu de doner plège, par la force dou ban J. B. L'en doit savoir se (que) cil qui porfist (possède) teneure n'est pas tenuz de doner plège. L'en apèle cel possessor qui a terre, ou a borc ou a cité, ou a pou ou a grant. Celui qui en a la sole seignorie est possessor, et cil qui a ou qui tient aucune terre por l'amender, est possessor ; et cil qui n'en a, san plus, fruiz, n'est pas possessor. Le créancier qui tient le gage n'est pas possessor : cil qui tient en bal n'est pas possessor12.
§ 27.
Se teneure est donée en doaire, et la feme et le mari sont possessor, par la seissine qu'il en ont. Li orfelin et li tutor, s'il porsient, sont tenu por possessor ; et se un tutor porsit, autant en doit l'en dire.
§ 28.
Se tu me demendes la chose que ge tien, par jugement qui a esté dit contre moi, et ge apèle au roi, l'en demende se ge tieng cele chose ? et l'en dit à droit que ge la porsief, tant com la cause de l'apel durra : ne ce ne nuist pas, se ma chose vait en autre main. L'en doit voir le tens de la plévine, et qu'ele soit fete segont droit13.
§ 29.
Un jura ou jugement qu'il auroit aucun à jor, ne se parjure pas s'il n'i vient, por qu'il reviegne (ne viegne) par l'otroi à cels à qui il jura14.
§ 30.
Et se aucuns nie qui ne soit pas plèges, comment en doit-il estre atainz ? et l'en dit que par le recort de la cort où il fut plège, se la cort est tele qu'ele port recort. Et se la cort n'est tele qu'ele porte recort, cil qui demende le doit prover por soi et par tesmoing, et i aura gage, se les dui parties se consentent, s'il i a cause dont gaige doie nêtre. Et se la cause est si petite qu'il n'i ait gage, li chois de la prove est à celui à qui l'en demende.
§ 31.
Uns hons fist semondre un autre, et dit issint devant le juge : Ge demendoie à Tybert cent ; tu le plévis qu'il vendroit à jor ; dedanz le [p. 91] jor, il s'en est foïz : si te demant l'ome, ou les cent t. (tournois ?) Li copables nie la plévine ; li autres dit issint : Se tu viauz nier qu'il ne soit voirs, je sui près dou prover por moi et par deus garanz, si com ge devrai, en champ et par batalle, si com il devroient ; et li autres fet encontre tel ni et tel deffense comme il doit. L'en demende que en dit droit ? et l'en respont que cil à qui l'en demende, est loisans de prendre la prueve de celui et de ses garanz, et de quenoistre que est voirs, ou d'escondire vers l'un des garanz par gage de batalle.
§ 32.
Jehanz de Beaumont dit : Se aucuns promet vers celui à qui l'en a fet le forfet, plège de venir à jor, J. dit qu'il ait en cele cause où il est lores, jusques li juges en ait jugié droit. L'en demende que veaut dire ceste parole qui est desus, qui dit en cele cause ? et ge di que cil i doit estre en cele cause, qui n'empire pas le droit au demendeor. Quar se cil qui estoit au plet en yuel leu, ala en plus fort, et mua le leu en sa persone, por grever son aversaire en poine ou en despens, je di qu'il ne le puet fere.
§ 33.
Nos usons d'autre droit : quar cil n'et pas délivré, qui est queneuz qu'il a forfet, ains est tozjorz tenuz vers celui à qui il fet le forfet, jusque il ait amendé segont le forfet. Et se cil n'a riens que sun cors, l'en le doit metre en paine corporel, por ce que aucuns (n'ait) achoison de fere forfet15.
§ 34.
Se li serf n'et pas présenz, contre qui aucun viaut plaidier de forfet, et li sires soit présenz, qu'il quenoisse qui l'a jà en son poer : Jehan dit que l'en doit le seignor forcier dou serf fere venir avant au jor, ou qu'il pregne lou plet sor lui ; ou se il ne le veaut deffendre, qu'il dont plège, que au plus tost qu'il porra le fera venir avant. Et s'il veaut qu'il ne soit mie en son poer, il est tenuz d'amender le domage que li demanderres i aura par sa mençonge. Et se li serf est présens, et li sires n'est pas au païs, ne il n'i ait qui le défende, li prévolz le retindra jusque li sires soit venuz ; et quant li sires sera venuz, il le deffendra ; et s'il ne le veaut deffendre, il le lerra corre en la cause dou forfet. Et se l'en plédie d'aucun, que n'a en la chose que son [p. 92] usage, de cause de forfet, et il en chée, l'en li doit tolir son usage, se li usages vient à lui par don, porce qu'il n'est mie recorz dou bienfet que l'en li a fet, et fet de bonne foi male foi. Et s'il a achaté l'usage, et il soit condempnez dou forfet, ausit le perdra-il, por ce qu'il n'ait acheson, ne autres, de fere tricherie ne desloïauté16.
§ 35.
Se pluisors ont un serf, et li un le vuelle deffendre por sa part, il ne sera pas oïz, ainz convendra qu'il le deffende tot le serf, non pas demi : quar l'en ne doit pas respondre de forfet en partie, mès en tot.
§ 36.
Se aucuns promist qu'il auroit à jor un serf, et il a au jor franc, se la cause est de forfet, bien s'aquité ; et se la cause est en nom de servage, il ne l'a pas au jor si comme il doit : car autrement done l'en en plège de cause de servage, et autrement de cause de forfet.
§ 37.
Se aucuns promet qui aura au jor un franc, bone chose est qu'il le doit avoir franc, porce que li quas de la franchise est en la cause envolopez17.
