XI. De celui qui destorbe aucun qu'il n'auge a jor.
§ 1.
Se celui qui destorbe aucun qu'il n'alle à son jor. — Loys roi cuida très-bone chose fere de refraindre la trecherie à celui qui destorbe aucun qui ne viegne à son jor. Et il ne cuidet pas solement de celui qui le retint o ses mains par tricherie ; mès cil qui le fit retenir à ses sergenz, ou qu'il pria qu'il fust retenuz. Nos apelons ce mauvèse trecherie, que se aucuns nonce aucun qui vet à son jor acune mauvèse novele, por quoi il s'en retort, par droite achoison bien le puet fere, s'en ne li fesoit fauseté entendent, il i seroit tenuz ; jà soit ce que aucun dient, que la cope en est sor celi qui aloit à son jor, por ce qu'il crut trop légièremant1.
§ 2.
Se cil à qui l'en demende ne vet pas à son jor par la tricherie à celui qu'il li demende, ne aura pas demande contre lui, et c'est la poine de la tricherie, porce qu'il i ait reson envolepié : autrement vet, se [p. 93] autres l'empesche. Et se pluisors le li font par trecherie, tuit en sont tenu ; et se li uns en fet la poine et l'amande, tuit li autre en sunt délivre : car il ne nuist riens, se tuit se consentent de plédoïer en un de ceste cause, bien le pueent fere ; ne ceste demende n'est pas donée que dedenz l'an, ne n'est pas donée à l'air, ne contre l'air2.
§ 3.
Se li serf à celi qui me demende, par le seu au seignor, et qui pas ne li deffent, fet que ge ne puisse aler à mon jor, J. B. dit que g'é (j'ai) bone barre contre le seignor au serf, que li sires n'i puisse gaagner. Et se le serf le fet contre la volenté au seignor, J. B. dit que demande de forfet doit estre donée contre le serf ; ne son fet ne doit pas nuire au segnor, ne mès tant qu'il les mete hors de soi : quar il n'i a péchié de riens3.
§ 4.
Gefroi de la Chapele dit : Demende de fet avient, en ce ban, à celui qui fist tant que celui qui estoit citez ne vint à son jor, por tant com il i aura eu doumage. Et se cil qui fera par sa tricherie que l'en ne puisse aler à son jor, yuel chose sera que s'en le demende, qu'il perde la sesine, qu'il ne gaent en sa trecherie ; et s'il demende, que l'en ait barre contre lui, jusque il ait amendé à l'agart de la cort. Et se li demendeor par le cochiement son aversaire est destorbez, et li copables par le cochiemant au demandeor est destorbez, li prévolz ne s'entremet fors par sa demande : quar conchiement ira contre conchiement4.
