École des chartes » ELEC » LI SEGONZ LIVRES » XV. De metre jor et de semondre.

XV. De metre jor et de semondre.

§ 1.

L'en dit ci1 que l'en doit semondre home, quant il se plaint de lui, quant il a forfet.

§ 2.

Or est à savoir la menière commant. Se aucuns se plaint l'en tegne son héritage, l'en dit (doit) semondre des mobles ; l'en doit semondre des domages ; l'en doit semondre des ledissemanz ; l'en doit semondre se li filz se plaint de son père. L'en ne doit pas semondre se l'en ne siet certaine chose por quoi. L'en ne doit pas semondre por desvé ne por menor, sanz tutor, ne por fame de plainte de son mari, se n'est por la cruauté son mari ; ou se feme se pleint d'autre, non, se l'en n'en a le congié de son mari. L'en ne doit pas por serf semondre son seignor, se n'est por sa cruauté : por sergant et por sergente l'en doit semondre.

Or demende dou jor de la semonse ; et l'en respont que l'en doit avoir jor selonc le cas. De murtre, de rat, de larrecin, de traïson, d'omicide, de membre tolu, n'a point de jor, et de trives demender, de novele désesine qui est fete prestement. J'apeau présantement après le fet, que l'en vient prestement à la jostice por soi plaindre, et de prandre cors d'ome et de fame. Et qui se plaint de marcheandise, ou de prest, ou d'autres choses, ou de dit ; don li juges doit fere semondre avenant, segont le leu et la persone, ou d'un jor, ou de deus jorz, ou de huit jorz, ou de quinze et d'asé plus assez, segont ce qu'il verra qu'il fera à fere.


1 V. tit. 5 de ce livre.