IX. Que l'en ne destorbe aucuns venir a jor.
§ 1.
Que l'en ne destorbe par force celi qui sera semons.
§ 2.
Li rois Loys fit ce ban, por metre à mesure cels qui destorbent à venir à jor celx qui sont semons. Jehanz de Beaumont dit issit, que se aucuns fet mal, l'en doit doner contre lui sentence de malfet, s'il ne le fet par le commendement le roi, et lors s'il a sentence contre lui, ele sera sanz paine1.
§ 3.
Gefroi de la Chapele dit que cil bans n'a pas leu, se cil est hors dou poer à celui juge qui le fera semondre.
§ 4.
Et certes, qui apèle tex gens, il ne fet pas tort qui les destorbe de l'aler au jor.
§ 5.
Et encor se puet meaus tenir celui d'aler au jor, qui sot que aucuns l'a semons qui semondre ne le deit fere.
§ 6.
Et se aucuns détient aucun serf, qui est semons, de venir à jor, l'en dit que bien le puet fere, quant ses sires ne fut amonestez qu'il en feit droit : quar l'en ne doit pas semondre tex persones sanz le seu au seignor cui il est. Et qu'en fera l'en s'il vient au jor ? l'en ne le doit pas recevoir, se l'en sot qu'il fust serf, jusque ses sires en fust amonestez2.
§ 7.
Johans de Beaumont dit que, se aucuns destorbe autre qu'il [p. 86] ne viegne au jor, par force ou par trecherie, cil bans le met en paine.
§ 8.
Cil bans : destorbe, ou soutrere, est mult généraus, si comme Johans de Beaumont dit. Soustrere c'est tolir, en queque menière que l'en le face, ausit com se aucuns ravisoit aucun par force, et le destorbast qu'il ne venist à jor, et qu'il perdist sa demende ou sa défense, ou que la chose fust dou tot perdue. Cil est droiz destorbeor, tout (n'i) ait-il le cors dou destorber ; cil est tenuz de cest banz. Et se aucuns détient celui qui est tenuz en plet, par trecherie, certaine chose est qu'il est tenuz en plet par cest ban. Et li rois deffent que nus ne face par quoi li semons ne viegne au jor. Et cil puet bien estre destorbé sanz tricherie, quant il n'est dou poer au juge3.
§ 9.
Et se aucuns est destorbez par autre que par celi qui ne le puet fere, s'il est présens ou non, sentence por le fet est donnée contre celui qui le destorbe. Et en celui jugement n'est pas commune la vérité, mès tant com li desmenteor prise la chose dom est li contens : et c'est ajosté, que l'en doit voir s'il i a droit, por doner la paine contre celui qui a tort. Et Johan de Beaumont dit que chascun doit motrer qui soit exanz, s'il est, c'est-à-dire qui n'est pas dou poer à celui juge, par si qu'il ne soit pas tenuz d'aler devant celui juge. Et s'il i vient, la paine remaint, por ce que l'en doit entendre les paroles o le parfet. Et tel jugement est de fet ; et s'il i a plusors qui l'aient empeschié, la paine corra contre toz ; et as ers donra l'en le jugement, s'il i ont domage ; ne ne sera pas doné à l'oir, ne contre l'oir, ne emprès l'oir (l'an)4.
§ 10.
Cil qui sont tret (soustret) à force le détor, se cil qui le fortret (paie), il ne délivre pas celui por cui il paie : car l'en doit entendre qui paie la paine dou forfet5.
§ 11.
L'en demende comment l'en puet tex choses prover, de metre sus à home que l'en le destorbe ? et l'en respont qu'en tex choses ne sont que sormises ne que sairement.
