III. De fere ce que li juiges commande.
§ 1.
Il apartient à touz juges, qui deffendent lor juridictions par jugement de peine. Cil ne fet pas ce que li juges commende, qui ne fet ce qu'est le darrenier de la juridiction : ausint cum se aucuns ne fet pas ce que droit done, il convient que l'en i mete force ; et se aucuns ne fet la fin dou commendement, il est chose veue qu'il a passé le commendement. Se ton procurator, ou tutor, ou curator d'orfelin, ne fet [p. 80] ce que li juges commende, il est puniz, non pas li sires, ne li orfelins.
§ 2.
Renaut de Triecort dit que cil qui demende n'est pas seulement liez de fere le commendement ; mès cil à qui l'en demande.
§ 3.
Cil jugement se clot, non pas solement en domage de la chose, mès en ce que droit doit regarder ; et tout i ait-il pure peine, ale ne dure pas outre l'an, ne contre l'air.1.
§ 4.
Nus ne doit fere somondre devant juge por héritage jusque l'an est semons le juge, qui lo mete en sesine, que qu'an aut de la querele au juge.
§ 5.
Quant juges fet semondre un home por ses défauz, la semonse doit estre fete par ses homes liges, trois foiz, et par tex qu'il les puissent juger. Et si défaut, lors puet-il jugier contre li, hou (ou) por li, et li troi jor doivent estre chascuns de quinze jorz, et li quars de quarante jors.
