XVII. De pez.
§ 1.
De pez. R(ubrica). — Qui fet pez de chouse douteuse, et de plez qui n'est pas certain ne finez, l'en puet recevoir pez, non pez (pas) solement se la promesse est achevée ; mès se li convenanz n'et (n'est) acordez1.
§ 2.
Gautier se pleint de Robert, et dist que pez estoit fete dou contenz d'une meson que Gautier li demendoit. Robert li nia la pez ; li autres se demende le recort de cels qui furent à la pez, et nomer le leu où la pez fut fete. Et Robert dit qu'il ne veaut avoir point de recort, com cort de tex genz n'on[t] point de recort. L'en demande que en dit droit ? et l'en dit que, se la cort est tele qu'el en doie porter recort, li recorz courra par preudes homes, et par le recort sera seue la forme de la pez. Et se la pez est queneue, et il ait discort, ausi sera seue par le recort. Et se la pez fut fete sanz jutice, ou par jutice qui n'a pas recort, et ele soit niée le recorz ne corra pas ; et se cil qui demande veaut prover la pez par soi et par garanz, et li autres face encontre tel ni et tel deffense comme il doit, il n'i a que la prove à celui à qui l'en demende.
§ 3.
Enten se pez est fete devant juge, et ele est niée doit estre seu par le recort de bones genz ; et en pez que l'en dit qui est fete sanz joutise, n'a que sormise.
§ 4.
Quant l'en apèle home de ses membres, et il en fet pez par joutise, an commune seue, à un de ceaus qui a action contre li, de tant il est dèlivrés vers autres genz.
