II. D'establissemanz.
§ 1.
Cet ban contient grant loiauté, et sanz marir nuil. Qui refusera à tenir le droit q'il meismes dit, ou se fet dire ? nus ne doit ce refuser.
§ 2.
Cil qui aura jugié ou establi contre aucuns noveau droit, il doit user d'autretel droit à la requeste son aversaire.
§ 3.
Se aucuns empètre noveau droit devant son juge, et amprès, à la requeste son aversaire, ne veaut cil user de celi droit, il doit sofrir que ce tiegne et vauge an sa persone, qu'il crut que vausit en persone d'autrui.
§ 4.
Cez paroles, que celui establist qui a juridicion, nos le devons prendre en fet, non pas en parole.
§ 5.
Et s'il viout establir aucune chose contre droit, l'en deffent que l'en n'i obéisse : quar ceste parole qui est apelée establir, senefie parfete chose, et injure achevée, non pas commencée.
§ 6.
Et se aucuns dit droit entre aucuns, et il n'et (n'ait) juridiction, ce qu'il dit ne vaut riens, et sa sentence est nulle : car l'enforcement au juge ne vaut riens là où il n'a point de juridiction1.
§ 7.
En ce droit est establi, se li juges fet trecherie, qu'il soit puniz, et se li droiz est dit autrement qui ne convient, par la niceté as jugeons, ce ne doit pas nuire au jugé, mès au jugeors2.
§ 8.
Se aucun empètre an cort contre aucun, et il let celi droit qui use, de celi droit doit l'en huer (user) contre celi qui l'a empétré ; mès si ne l'a empétrié, il n'est pas tenuz. Et s'il empètre aucune [p. 79] cause (et en use) ou s'il empètre por an user, tout n'en ait-il usé, cet ban le punit3.
§ 9.
Se un procurator que j'ai establi en mes choses viot user d'un droit contre mon aversaire, mis aversaires usera de celui droit contre moi ; et se tutor ou curator de desvé pu à orfelin qui n'ait pas quatorze anz, le demande, aura le il ? l'en li otroie : et ce doit l'en garder entre tés persones.
§ 10.
Ceste (peine) est establie contre totes genz, non pas solement contre celi qui demende ; mès ausit contre celi à qui l'en demende.
§ 11.
Se celui por qui tu es plèges, empètre que aucuns qui riens li date ne puisse user contre li de barre, et tu vuelles user en celui afere, don tu es plus ; griés, il n'avient pas que tu n'en puisses user. Et s'il avient aucunes foiz que tu soies grevez, come il avient que cil qui doit ne puet paier, et tu chiés en ban, cil à qui tu demandes aura barre contre toi, et tu n'en aras point contre li.
§ 12.
Se mi fiz qui est en mon poer chiet an cet ban, l'en demende s'il a leu en demendes qui vienent en sa persone ? et l'en respont que l'en ne quide pas que la condicion au père en soit peor. Or demende l'en, se cete paine passe jusqu'à l'er ? Johan de Beaumont dit que l'en ne doit pas paier son air. Cil Johan ne dit pas ce sanz reson, et quide par cete cause que l'en ne puisse pas redemander ce que l'en a paé : car ge quit que les naturés causes remeint, qui défent que l'en ne puet redemender ce que l'en a paié, se l'en ne veaut prover le contraire.
