XVI. De convenances.
§ 1.
[p. 100] La droiture de cest ban est naturel ; et que chose est plus acordable au monde (qu') est garder ce qu'est enconvenancé entre les genz1 ?
§ 2.
Convenanz est dit de convenances, et en non de pez, et est convenance d'un ou de plusors, plésir et consentement en une chose. Parole de convenance est général, et apartient à totes les choses don l'en a afère ; si comme de celx qui se consentent en un marchié et en une pez. Ausint comme l'en dit que cil s'asemblent en un leu, qui de divers loeu (en) un leu s'asemblent, ausit cil s'acordent de divers corages en une sentence2.
§ 3.
Se aucuns dit que aucuns ail fet marchié à li, et li marchiez soit queneuz ; et cil qui a vendu veaut jurer qu'il ne puet segre le marchié, il s'en passera par tant, et paera cinq sols de sa paumée, quant il n'a eu point de cheté ; et s'il a eu cheté, il le tendra, s'il a de quoi.
§ 4.
Le non de convenance est si généraus que j'ai dit, en tel bien que il n'a marchié ne obligacion où il n'ait convenance, ou par chose, ou par parole. Car promisse qui est fete par parole, s'il n'i a consentement, est nulle3.
§ 5.
Uns hons dit issint : Pieres me convenance qu'il me presteroit son cheval à aler jusque à Blois ; ne l'ai pas eu, si le vuel avoir. Cil niee : li autres l'ofre à prover por soi et por garanz, et li autres fet encontre tel ni comme il doit. Droiz dit qu'il n'i a que la prove à celi à qui l'en demande.
§ 6.
Uns hons dit à un autre qu'il li devoit baller sa fille por gesir à lui, et la veaut avoir par la convenance : et l'en respont que tele convenance n'est pas tenable, qu'ele est pécheresse et laide.
§ 7.
Uns hons dist que uns autre li devoit un cheval por quarante sols ; si viaut avoir le cheval por les quarante sols ; et l'ofre à prover par soi et par garanz. Et li autres fet encontre tel ni comme il doit. Et l'en dit qu'il n'i a que la prove à celi à qui l'en demende.
§ 8.
[p. 101] Enten que qui mot sus convenance qui n'est acomplie en aucune chose, et est nié, il n'i a que la prove à celui à qui l'en demende.
