XIV. De demende fere.
§ 1.
Demende si est pure ou mellée. La pure si est, quant aucuns demande héritage par la reison de ce que il est heirs. La mellée si est ce que l'en demende por soi et por autrui, si comme quant aucuns dit : Je me plein de tel home, qui a fet tel home metre en prison, por apeticier ma juridiction, ou por rapeler ma bone sentence.
§ 2.
De fere sa demende, ou qui viout fere sa demende, ne vaut riens sa demende, se ele n'est à droit dite. Car c'est yuel chose que cil qui demende die sa demende, si que cil à qui l'en demande sache s'il veaut lessier le plet ou tenir ; et s'il bée à plédier, qu'il viegne toz garniz au plet de demender ou de défendre1.
§ 3.
Demender est sa demende dire de boche, ou fere la dire par autre qui fere le puisse, et embracier en sa demende quanque l'en veaut demander.
§ 4.
Uns di que cil ne fet pas sa demende, qui toute ne la fet : et le [p. 98] secort celx qui ne sevent fere lor demende, ou par aage, ou par viellegnere, ou por nature de fame, qui ne set pas mout2.
§ 5.
Uns hons demende lés, que li morz a lessié as hériters3 ; et dient issi, que s'il est nié ne mesqueneu, qu'il est prez de montrer (et) de l'averier, et par soi et par garanz. Et li autres reus fet encontre ce tel ni et tele deffense com il doit. Et droiz dit que l'en en doit trere celx qui furent au testament : quar l'en doit accomplir la volenté au mort ; quar mout seroit dure chose, se de testament nesseit batalle.
§ 6.
Quant aucuns demende aucune chose, et la fera (l'offre) à prover, et reus ne fet riens, ne ni ne deffense, queneue chose est qu'il det ce que l'en li demande.
§ 7.
Se l'en demende à aucun chose qui soit de la borse le roi4, l'en usera de tel droit, que li rois fera enquerre de tel chose par bones genz, qui bien le sauront ; et se enqueste donne au roi, li rois aura, et se enqueste li tout, il se téra.
§ 8.
Uns dit à un changeor qu'il li avoit vendu tornois, et un autre marcheant, qu'il li avoit vendu poivre ; et l'offri à prover par soi et par garanz. Et li autre fesoient encontre ni et deffense, tel comme il devoient, et ne disoient pas qu'il lor eust ballé point d'argent. Et droit dit qu'il n'i a que la prueve au changeor, ou au marcheant, contre li et contre ses garanz : car tel chose n'est que sormise. Et se li fiz au prodome, qui est en bal, fet tel chose, i est li prodom tenu ? oïl, s'il le fet par son commendement, ou par son consentement, ou autrement non. Et se li serf fet autel marchiez, i est li sires tenuz ? oïl, s'il l'a fet par la volenté au segnor. Car droit s'acorde, qui a le preu il doit avoir le domage en cele meisme chose. Mès s'il le fit sanz le seu au segnor, assez est se li sires jure qu'il n'a riens eu de son gaaing5.
§ 9.
Uns hons dit à un autre que il li doit trente toneaus de vin, qu'il li vendi vingt livres, et celes vingt livres il li a paiés ; et s'il veaut dire que ce ne soit voirs, il est près del mostrer et de l'avérer par soi et par garanz. Li autres fet encontre tel ni et tel défense com il doit. L'en demende qu'en dit droit ? et l'en respont : Cil qui défant est loisanz de [p. 99] prendre la prove de lui et de ses garanz, ou d'escondire par gage de batalle.
§ 10.
Uns bons vendi un cheval à un autre : se li en demande quarante solz, comme à celui qui a eu le cheval. Li autre nie qu'il ne doit riens. Cil l'ofre à prover soi, sanz garanz ; et li autre fet encontre tel ni et tel deffense comme il doit. Et droit dit que cil est loisans de prendre la prove de celui qui demende, ou escondire par la soe : et ce droit est tenu à Orliens. Et en l'ostel le roi ne fera ne escondit, ne autre chose, s'il n'amène son garant o soi.
