XII. Se aucuns ne tient les plévines de venir a jor.
§ 1.
Se aucuns ne tient pas les plévines qu'il fist por venir à jor, li rois commende que nus ne soit semons qui n'ait licence de venir à son jor, et qu'il et (qu'il ait) vingt mille pas en la jornée, fors celi jor où il convient plédier : quar tel jornée n'est pas griève ne à l'une partie ne à l'autre1.
§ 2.
Nos requirons que l'en ait celi à jor que l'en ait plévi, tout ait l'en fet pez de la chose, por savoir la droiture au prévost.
§ 3.
Se aucuns sanz trecherie est destorbez par droite cause, qui [p. 94] ne puisset estre à jor, segont ce que l'en a promis, droiz dit qu'il a bone barre ; et ausint, se l'en demende à tesmoing porter2.
§ 4.
Nos clamons droite cause, maladie, prison, tempeste, cretine ; la mort de prochein ami ; noces de li, ou de son filz, ou de sa fille, ou de celi qu'il aura en garde ; ou s'il est de garde, ou s'il est en prison ou febleté ; ou se fame est grosse environ l'ore de enfanter ; ou se aucuns chiet en forsenerie ; ou se li ponz est dépecez et il n'i ait point de navie. Et nos entendons tempeste qui viegne à cele jornée, à tel hore que l'en ne puisse aler à son jor ; et dou fluve ausint, s'il est si granz. Et se aucuns chiet issint, qui ne set la tempeste ne la force dou fluve, et que s'il fust meuz avant, il fust bien passez, et il se mist en tel besoing, barre li aura mester, quant l'en aura oï la cause : quar l'en ne li doit pas si atrecier, que l'en ne li die : Porquoi [ne] meus-tu avant que li jorz venist ? Ne ne doit l'en pas sofrir qu'il i ait domage ; ne barre ne doit pas avoir mester à aucun, quant il n'i a ne angoisse ne péril. Autretel barre a cil qui fut retenuz de jotice, et la retenue fu fete sans sa coupe3.
§ 5.
Et se aucuns est condempnez à mort, ou forbeniz dou païs, l'en li doit aidier : quar il a assez paine. Nos devons entendre quant il est dampnez ou de mort ou d'esil. Et ceste barre est nécessaire à ses plège.
§ 6.
L'en demende se dous se puent acorder qui plèdent ensemble, que l'un ne puisse metre barre contre l'autre par cause por venir à jor ? Et G. dit nenil, que tés convenances ne valent riens : quar tés convenances engendre mauvès gaen, et movent péril de pardurable salu. Mès ge cuit qu'ele vaut issint, se les quases des barres sont espéciaument devisées, à qui li prometeor renoiee espéciaument par sa volenté4.
§ 7.
Encor demende l'en se aucun qui ne doit pas doner plège de venir à jor, done plège, savoir se il et si plège i sunt tenu por vice ? et je orrai qu'il i a devise : quar si plévi par folie, il n'i sunt pas tenu, et s'il plévi par convenance, il i sont tenu. Car si plévi par niceté, ce dit G., por achoison d'ester à droit, il doit avoir barre qui issint promet ; et [p. 95] s'il i a promesse par convenance, G. dit que la barre sera ostée, par la reson de promesse en convenance5.
§ 8.
Renaut de Triecot dit : Se dui à qui l'en demende prometent l'un por l'autre, qu'il vendront à jor, ou peine, et li un destorbe l'autre, la paine doit estre commisse, por ce qu'il sont compagnon, por ce que la tricherie ne lor valle rien.
§ 9.
Et se dui prometent qui sont tret en cause que l'un vendra à jor, et il n'i viant pas, et le demandeor veant, et demant à l'un la chose, et à l'autre la paine de ce qu'il ne vint pas au jor : s'il demende la paine, il sera hors de la barre. Et se li pères promet que sis fiz vendra à jor, et emprès viant cil qui demende, et emplède par le marchié dou fiz, barre metra hors le père de la paine ; et autresit est se li fiz promet, et le demandeor plède ou le père de la chose au fiz6.
§ 10.
Se aucuns done plège de venir à jor, et por ce qui fut en l'afère dou commun, ne vint pas : nos dison que li plège n'i est pas obligiez, fors de li avoir7.
§ 11.
Se serf promet qu'il vendra à jor, et il n'i vient, la promesse vaut : quar au mains i doit-il venir por soi escuser. Et se l'en promet por plusors sers de venir à droit, l'en port toute la poine, se un en faut, si com dit R. : car voirs fui que tuit n'i vindrent pas. Et se la poine est prise et offerte por celi qui se deffalli, et amprès demant l'en as autres la poine ce qui en remaint, cil qui sera tret en plet de ceste promesse aura barre contre l'autre de tricherie8.
§ 12.
Se aucun promet à avoir à jor aucun, qui estoit jà délivrés de la demende que l'en li fesoit, il i doit envoier, por savoir et por enquerre et por cerchier la vérité de sa délivrance.
§ 13.
Aucun que voloit pleidier d'injure avoit un plège, que sis aversaires vendroit à jor ; et quant la promesse fut acordée, li plège mori. L'en demende se si eir i sont tenu ? et l'en dit que non : et dison, quant aucun voit plédier de plévine à l'oir à cel qu'il plévi, il n'a pas action de plédier à celi9.
§ 14.
Se aucuns promet que aucuns vendra à jor, il le doit fere venir [p. 96] en cela (cele) cause, si que cil qui demende n'i puisse avoir domage par son délai ne par son barat.
§ 15.
A toutes les foiz que sers est pléviz de venir à jor por plédier, ou por soi deffendre, ou li sers meismes le promet, la promesse ne vaut riens, ne la plévine ne vaut riens : car sers ne puet demander, ne l'en ne li puet demander, sanz son seignor.
§ 16.
Se li procurator que l'en aura envoié por moi, plévist que ge vendrai à jor, la plévine ne vaut riens, por ce qu'il est ausit comme sires en la chose. Et se le procurator plévist de rendre la value de la chose, l'en demende s'il est tenu ? et l'en dit que nenil, s'il n'a espéciau commendement dou seignor de cel fet10.
