le logo Elec

L’année 1437 dans la pratique de Pierre Christofle, notaire du Châtelet d’Orléans

94 r°Et le dimenche XXVIIIme jour dudit mois.

Jehan Coechin, laboureur, parroissien Saint Privé lez Orleans, baille et aloue Jehannin Coechin son filz, aagé de XIIII ans d’aage ou environ si comme ledit Jehan son pere disoit, a Pierre Yvete, boulengier et marchant d’Orleans, qui le prent, de la Saint Jehan Baptiste prouchaine venant jusques a quatre ans prouchains aprés ensuivans, pour estre et demourer avec ledit Pierre Yvete et le servir en son mestier et marchandise de boulengier et en ses autres affaires licites et raisonnables comme varlet aprantiz doit servir son maistre. Et pour ce faire, ledit Pierre Yvete a promis et sera tenu lui querir et administrer boire, mengier, lit, hostel, chaussemens et vestemens selon son estat et que a lui appartient. Avec ce le introduire ou fait et marchandise de boulengerie se en lui ne deffault. Et plus, a promis ledit Jehan Coichin, pere dudit Jehannin, aler querir sondit filz s’il s’en va hors d’avec ledit Pierre Yvete dix lieues en tous sens. Obligent de chacune partie et mesmement ledit Jehan a tenir prison fermee etc.

Dans la marge gauche : f
et au-dessous : P. Yvete