IV. De crime qui est fez contre la majesté l’enpereor [rubr.]

Ulpians dit : li crimes qui est fez contre la maesté l’enpereor est procheins à sacrilige. {1} Ce est li crimes qui est fez contre le pueple de Rome et contre la seurté de l’enpire. Et de cest crime est corpables cil par qui porchaz et par qui tricherie consoil est pris que ostages soient rendu sanz le commandemant au prince ou occis, ou que home armé soient en la cité o glaives et o pierres, ou que il s’asenblent contre la chose commune, ou que li commun leu soient porpris ou li temple, ou que home soient esmeu à traïson ou à dissension ; et par qui porchaz et par qui consoil est pris que aucuns des metres dou pueple de Rome qui a commandemant et poesté sus les autres soit ocis, ou que aucuns port armes contre la chose commune, ou qui envoie as anemis au peuple de Rome mesage ou letres ou leur fet signe, ou il fet par tricherie que li ennemi au pueple de Rome soient aidié par son consoil contre la chose commune, ou qui escommuet les chevaliers par qui dissession ‹ou› noise est fete contre la chose commune. ¶ Dissession si est quant l’en se descorde et noisse en sort.

Cil moismes dit : ou cil qui ne se pert pas de la contree que il a guovernee quant uns autres a esté envoiez en son leu, ou cil qui a lessié [191vA] l’ost que il devoit garder, ou li bas hom qui s’en est alez as enemis au pueple de Rome, ou cil qui à son esciant escrit fause ovre cité es communes tables, car cist est ou premer chief de la loi que Julius fist do crime qui est contre la majesté l’enpereor.

Macer dit : la loi des .xii. tables commande que cil qui escommuet les anemis contre le pueple de Rome ou qui leur aide d’aucunne chose, soit puniz par poine capital. Et la loi que Julius fist do crime qui est fez contre la maesté l’enpereor commanda que cil qui mesfet à la commune majesté soit puniz ; itel sont cil qui s’enfuient de bataille, ou qui tienent forterece contre l’enpereor, ou traïssent leur ost. Par ceste meisme loi est tenuz cil qui fet bataille sanz le commadement l’enpereor, ou a esleu ost en la contree que il a guovernee et ne le baille pas à celui qui a esté envoiez en son leu, ou qui guerpist l’enpire ou l’ost ou pueple de Rome, ou li bas hom qui à son esciant a fet aucunne chose par tricherie por le mestre, ou cil qui a porchacié que aucunne des choses qui sont escrites devant soit fete.

Scevola dit : cist est tenuz par ceste loi par tricherie et par qui seremant aucunne chose est amenee qui soit contre la chose commune ; et cil par qui tricherie et par qui seremanz li oz ou pueple de Rome a esté meuz en aguiez et livrez à ses ennemis ; et cil par qui tricherie i remaint que li enemi ne veignent en la poesté au pueple de Rome ; et cil par qui porchaz et par qui tricherie li ennemi au pueple de Rome sont garni d’armes et de darz et de chevaux et de deniers ou d’aucunne autre chose ; et cil par qui porchaz et par qui tricherie il remaint que li rois ou une estrange nacion n’obeist pas au pueple de Rome ; et cil par qui porchaz et par qui tricherie estraige sont donné as anemis au pueple de Rome ; et cil qui met hors celui qui a reconeu son crime et est por ce mis en liens. {1} De cest crime est delivrez par le senat cil qui font les ymages l’enpereur qui sont depecees.

Modestinus dit : cil qui sont mal re[191vB]nomé, qui n’ont pas poer d’acuser, sont receu sanz nule dote à acuser de crime qui est fez contre la maesté l’enpereor. {1} Et li chevalier qui ne puent pas deffendre autrui causes ; car cil qui veillent por la pez doivent estre receu à cest acusement. {2} Et li serf qui en acusent sont oï, neïs contre leur seigneurs, et cil qui ont esté franchi contre leur patrons. {3} Neporquant, par la reverence de la majesté l’enpereor, li juige ne doivent pas tenir cest acusement à gap mes à verité. Car il doivent regarder à la persone qui est acusee, savoir mon se ele le pot fere et à ce qui a esté fet, et savoir mon se il estoit de saine pensee ; ne aucuns ne doit pas legierement estre trez à paine par l’error d’une parole. Et ja soit ce que li fol soient digne de poine, neportquant l’en doit esparnier à cez qui ne sunt pas de seine pensee se li mesfez n’est de cez qui sunt escrit en la loi, ou tiels que il doie estre vengiez en l’essample de la loi.

Cil meismes dit : cil par qui consoill ou par qui tricherie une cité ou une contree est traïe ou livree à ses ennemis puet estre acusez de crime contre la majesté l’enpereor.

Ulpians dit : cil qui muert en aucun crime muert en entier estat ; car li crimes est estainz par sa mort se il n’est corpables de crime contre la majesté l’enpereor. Car se si oir ne purgent icele crime, li heritages sera à la borse l’enpereor ; neporquant, tuit cil qui sont corpable de crime contre la majesté l’enpereor ne sont pas en cele condicion, mes qui par desloial corage s’est en hardiz de fere aucunne chose contre la chose commune ou contre le prince. Se aucuns est corpables por autre cause, li crimes est estainz par sa mort.