VIII. De homecides et des envenimeors [rubr.]

Marcians dit : cil est tenuz par la loi que Cornelius fist des homecides et des envenimeors qui ocit home, ou cil par qui tricherie meson est arse, et cil qui va armz por home ocirre ou por enbler, et cil qui estoit baillif ou juiges qui a fet faus juigement por condampner celui qui n’avoit rien mesfet. ¶ {1} Encor est cil tenuz par ceste paine qui confit venin por home ocirre et qui li done, et cil qui par tricherie dit faus tesmoing par coi aucuns soit condempnz en commun juigement à paine capital, et li baillif et li juiges qui prenent deners que enqueste ne soit fete de crime capital. ¶¶ {2} Cil qui ocist home est puniz sanz nule difference de quel condicion cil est que il ocist. {3} Et li enpereres [193vA] Adrians escrit que cil qui ocit home, et n’avoit pas corage d’ocerre, puet estre assous. Et cil qui ne l’ocit pas, mes il le navra por ce que il le voloit ocerre, doit estre condempnz comme homecides. Et par le fet puet l’en voer comment il est ; car se il tret le glaive et l’en feri au plus que il pot, il est certaine chose que il le voloit ocerre ; mes se il le feri petit, et en tel leu où il ne le cuida pas ferir à mort, ja soit ce que il feri d’arme esmolue, mes il n’ot pas corage d’ocerre le, sa poine doit estre alegiee. ¶ Se dui home tençoient et li uns feri l’autre d’arme esmolue, se il ne le fist par corage d’ocerre le, sa poine doit estre allegie ; car il fist homecide plus par avainture que par sa volenté. {4} Li enpereres Adrians escrit que cil qui ocit celui qui par force voloit compoignier contre nature o lui ou o aucun des suens doit estre quitez. {5} Et li enpereres Pius escrit que plus legier poine doit estre enjointe à celui qui ocist sa feme que il reprist en avotire ; et commanda que se il estoit bas home, il fust envoiez en pardurable essil ; et se il estoit en aucunne digneté, il i fut envoiez à tens.

Ulpians dit : li peres ne puet pas ocirre son fill, mes il le doit acuser par devant le prevost de la cité ou de la contree.

Marceans dit : en un chapitre de la loi que Cornelius fist des homecides et des envenimeurs est puniz cil qui a confit, ou vendu, ou gardé venin pour home ocirre. ¶ {1} A cele meisme paine est sozmis cil qui vent en commun mauveses medecines, ou qui les garde par cause d’ocirre homes. {2} Ce que l’en dit « mauvés venin » mostre que aucun venin sont qui ne sunt pas mauvés. Li nons est donc communs à celui qui est bons et à celi qui est mauvés, mes ceste loi ne parole fors de celui qui est mauvés que aucuns a por home ocirre. Et il est commandé par le consoil au senat que cele soit envoié en essil qui par nul mauvés corage dona à une feme une medecine par concevoir de coi cele qui la reçut fut morte. {3} Il est commandé en un autre consoil au senat que li especier qui vendent [193vB] mauveses espices par bones soient tenu par la paine de ceste loi. {4} Et cil qui suefre et set que sa mesnie prent armes por conquerre ou por recovrer la possession d’aucunne chose, et cil qui par dissession est meüe, et cil qui a pris aucunne chose do perill de mer, et cil qui a fet faus juigement ou qui a porchacié que il soit fez par coi cil qui n’a riens mesfet soit condempnz. ¶ Qui chatre home par cause de lecherie ou de vendre le, il est puniz selonc le consoil au senat par la loi que Cornelius fist des homecides et des envenimeors. {5} La poine de ceste loi est essill et soztraemanz de toz les bies. Mes il solent orendroit estre puni de paine capital se il ne sont mis en plus honeste leu por soffrir la paine de la loi ; et li plus bas solent estre baillié as bestes à devorer, et li plus haut envoié en essil. {6} Mes en quelque leu que il soient trové, il loist à ocerre les comme ennemis.

Ulpians dit : cil est tenuz par la paine de ceste loi qui porchaça, quant il estoit en une baillie, la mort à un home en maniere que n’est pas ostroié par les lois. {2} Li enpereres Adrians escrit : « il est establi que home ne soient chatré. Cil qui sont donc repris de ce crime doivent estre dampné par la loi que Cornelius fist des homecides et des envenimeors et leur biens doivent estre mis en ma borse. Et se serf font tel chose, il doivent estre sozmis à tres grief torment ; et se il ne sunt el païs, l’en doit prononcier contre aucuns que il sont tenu à la paine de ceste loi. Et se cil à qui cil torz a esté fez s’an plaignent, li prevoz les doit oïr ; car nus ne doit chatrer ne franc home ne serf, ne nus ne se doit abandoner de son gré à estre chastrez. Et se aucuns fet contre mon banissement, ce sera crimes capitals au mire qui le chatrera et à celui qui soffrera à estre chastrez de son gré ».

Renulcius dit : cil qui baille son serf à chastrer sera puniz de la moitié de ses biens par le consoil au senat qui fut fez quant Neraces et Antoines estoient conseillier.

Paulus dit : l’en prent tricherie par fet en la loi que Cornelius fist des homecides. Et [194rA] por ce, se aucuns se lesse cheer de haut et il chiet sus un home et il l’ocit, et cil qui cope un arbre giete jus une branche sanz mot dire et il ocist un home qui passoit par la voie, il n’apartient pas au chastiement de ceste loi.

Ulpians dit : se l’en set que fame ait fet chose par coi ele ait ocis l’enfant de son ventre, li prevoz de la contree l’envoera en essil.

Cil meismes dit : se aucuns ocit un larron qui enble par nuit, il en sera sanz paine se il estoit issi que il ne se peust garder sanz peril d’ocerre le.

Cil meismes dit : se aucuns aars meson à son esciant, il sera puniz par paine capital comme arderres.

Modestinus dit : il est otroié as jüies tant solement à circoncire leur filz ; mes se uns autres qui ne soit pas de leur loi le fet, il sera puniz par la paine à cez qui chastrent leur sers. ¶ {1} Se uns sers est venduz par conbatre soi as bestes sanz le commandemant au juige, cil qui le vendi et cil qui l’acheta sont tenu à soffrir paine. {2} Li seigneur n’ont pas poer de baillier à leur volenté leur sers à conbatre soi as betes ; mes se li sers est amené devant le juige, et la plainte au seigneur est droituriere, il sera sozmis à paine.

Cil moismes dit : se uns enfes ou un forsenz ocit un home, il n’est pas tenuz à la paine de ceste loi ; car l’enfance acuse l’un et la maladie acuse l’autre.

Cil meismes dit : nus est commandé par le consoil au senat que cil qui fet mauvés sacrefices soit puniz par la paine de ceste loi.

Calistratus dit : li enpereres Adrians escrit eissi : « l’en regarde es mesfet à la volenté et ne mie à l’aveinture ».

Ulpians dit : il n’a point de difference se aucuns ocit ou done cause de mort.

Modestinus dit : se cil qui ont fet homecide, ou de leur grié ou par tricherie, sont en aucunne digneté, il solent estre envoié en essil. Se il sont el segont degré, il sont puni par paine capital ; mes il doivent prandre plus legiere vengance descuriaus, se il puet avenir. Et l’en en doit demander consoil au prince et fere par son commandemant, se issi n’est que la noisse ne puisse [194rB] estre abatue en autre maniere.

Paulus dit : se uns hom a esté feruz en meslee et il muert, il convient regarder les cous que chescuns li dona de cez qui i furent assenblez.