École des chartes » ELEC » LI VINGTIESMES LIVRES » XVI. D'apiaus, de supplicacion et de faus juigemenz.
[p. 331]

XVI. D'apiaus, de supplicacion et de faus juigemenz.

§ 1.

Qui apele de malvés juigemenz n'a pas aucion contre les juiges, ne contre les juigeors, an els riens demander ; mès les demendes et les deffansses apartienent as parties averses. Et ce fu juigié de l'abie de Corbie et la commune, et de monseignor Johan de Saint-Cler et dou conte de Bloys, et do prior de Saint-Sanson d'Orliens, et des homes d'Aratvile, et de monseignor Guillaume de Nulli, et de une habaesse noère d'anviron celui leu : si comme l'en l'use en l'ostel le roi.

§ 2.

Segont la costume de France, l'en ne doit pas apeler, car ce n'a [p. 332] pas esté usé. Mès se aucuns est grevez de juigement, il doit dire tex paroles : « Je me tiens à grevez de la sentence que vos avez donée contre moi, qui n'est pas bone, ne tele comme ele doit estre selonc les us de la terre, ainz est malvèse, et ne me tiens pas [à] apaieiz, car li juigemenz est faus ; si en requier l'amendement dou soverain. »

Et quant il vient devant le soverain, si doit dire tex paroles : «  Sire, je soploi à vos, comme à soverain, que li quens de Blois a donée sentence contre moi en la cause d'une meson, qui ere entre moi et Gaubert, asise en tel leu et en tel censive ; et à tel jor fut donée, et de tex genz ; laquele est fause et mauvèse, et non droiturière, selonc les us do païs : por laquel chose, sire, je vos requier amendement dou juigement.

Lor si doit dire la cause resonable por quoi li juigement est mauvès.

§ 31.

Et li clein, et li répons, et li errement tuit [de] ce plet, doivent estre raporté en la cort dou souverain, et segont les erremenz et la suite dou plet, l'en fera tenir ou dépécier le juigement ; et que cil qui sera trovez en tort, l'amendera par la costume de la terre, et segont ce que li rois a establit desus en ses Establissemenz, ou titre d'apeler son seignor de défaut de droit, et de fauser juigement en cort de roi2. Et issint est-il usé en l'ostel le roi.

§ 4.

L'en doit somer son seignor lige par quinzenes [et] par quarantenes, tant que li anz et li jorz soit passez, et lors, se il ne velt ce que il a meffet amender, o fet rendre à son home sa chose, lors se puet plaindre de lui. Mès se il est issint, entre deus, que sis hons perde le sien, et il l'aist requis resonablement antre deus, et il pert le sien, tantost il se puet plaindre de lui sanz dilacion.


1 Ce qui suit jusqu'à la fin du § 3, est ajouté en marge du manuscrit avec un renvoi.
2 Ces titres font partie du livre préliminaire ; on les trouvera ci-après à l'Appendice, p. 348.