§ 1.

L'en dit ci : qui a privilége, et n'en use dedanz dix anz, que li priviliéges ne li doit rien valoir1.

§ 2.

Uns si avoit un usage en un bois, par privilége, à ardoir et à herbergier ; et vandi son usage, quant il s'en devait herbargier. L'en demende qu'en dit droiz ? Et l'en respont qu'il pert l'usage ; car il requenoist malvésement le bien que l'en li a fet2.

Enten que qui use de son privilége par tricherie il le pert.

§ 3.

L'en demende comment l'en puet quasser priviliége, don l'en dit que l'en a usé tricherressement ? Et l'en dit par présant, ou par conoissance. Et se li présanz est niez, enqueste corra, et rendra ce que sera trové en l'enqueste. Et se l'en met sus sanz présant, que l'en ait mesfet, en tel chose n'a que sormise, ce n'est que preuve ; car moult seroit grief chose, se (de) ton don que je aurai fet, me venait maus, c'est à entendre qu'il m'en convenist fere bataille.

§ 4.

[p. 330] Uns d'une religion orent un priviliége del roi, que toz cez qui se rendoient en lor ordre seroient franc de costume. Icil religios recevoient genz, et lor metoient seignaus ès piz, et voloient qu'il fussent frans de costumes. L'en demende qu'en dit droiz ? Et l'en respont que tel chose ne fet mie à sofrir3. Car tel chose est plus fete por tolir la droiture au seignor que por autre chose, ne il ne me doit pas venir (mal) de là don li bien me doit venir.

§ 5.

L'en demende se préviliége qui est fez en péchié est tenables, et qui fet plus contanz que pez ? L'en dit que tex priviliéges n'est pas tenables ; car torz ne doit pas issir de là don droiz doit nestre.

§ 6.

Por ce que Templiers et Hôpiteliers fessoient moult de maus por lor préviliéges, li rois establi ci qu'il ne recètent nus qui s'en fuie por son fet ; et s'il recètent aucun frère, qui encore ce qu'il ont remaignant ou siècle, tex ne sont pas hors del poer le roi, ainz soient josticé comme li autre.

Cist establissemenz soit gardez ; et qui fera encontre, l'en praigne totes ses choses temporelx, et soit hors de la garde le roi. Car l'en ne doit pas celui garder qui autrui droiture viaut dépécier. Et cil qui ne sont convers ne doivent pas avoir préviliége de convers4.

§ 7.

Li borgois de une ville avoient un priviliége dou roi, et enprès le perdirent, et requitrent le roi, com il eussent lor privilége perdu, qu'il lor en feist un autel, por garder la ville de domage. Et cil qui estoit tenuz au fere, et com cez qui estoient prez de prover la tenor de lor prévilége, et disoient, par plusors fez estoit li préviléges veuz en l'ostel le roi par devant le roi. Et li rois sot tot ce, et demende qu'en dit droiz ? et l'en respont que lor préviliéges doit estre refermez, car nus ne doit avoir domage sanz colpe5.

Rois doit porvoer son pueple par reson, et aus garder de péril et de domage.

§ 8.

Li borgois avoient un préviliége, qu'il ne devoient point d'ost en réaume, et se voloient deffendre par cest prévilége, qu'il avoient del roi. L'en demende qu'en dit droiz ? Et l'en respont que tex priviléges [p. 331] ne vaut riens ; car cil qui le dona, ne's pot fere frans plus que soi ; et préviléges qui est fez contre commun profit ne vaut riens, car tel préviliége amoine péril de perdurable salut.

§ 9.

Il avoit clerz en un lieu, et lessoient habit de clerc, et fessoient mout de ribauderies ; enprès prenoient habit de clerc por deffandre lor folies. Li rois commende que se tex bacheliers sunt pris, qu'il soient mis en une longuaigne, cum l'en ne doie pas soffrir ribauderies, mes lancier-les en mauvés leu6.

§ 10.

Por ce que en France, et an moult de leus, n'use l'en pas des lois de Rome, et poi trove la cause que par droiz de costume et de décrez ne puisse estre déterminée, por ce deffant li papes Honoires et li rois de France que celes lois ne soient leues à Paris, ne iqui anviron ; et qui encontre ce fera, ne soit pas oïz en cause, et soit escommeniez7.

§ 11.

Aucuns reçoit la franchise de l'Opitau ou del Temple, et d'aillors, et prenoient sainz, et les metoient en lor robes, et voloient avoir tel priviliége com cil qui estoient en la religion. Li rois commende que tex vilains soient de tel jostice comme li autre vilain del païs, et que ce ne lor vaille riens.