École des chartes » ELEC » LI VINGTIESMES LIVRES » XIII. Des previléges as mariez et des religios.
[p. 326]

XIII. Des previléges as mariez et des religios1.

§ 1.

L'en dit ci, que se clerc dedanz2 l'ordre de soz-diacre se marie, que l'en li doit tolir son bénéfice, et doit remanoir o sa feme. Et s'il est soz-diacre, li mariage doit estre départiz3

Enten que clerz qui n'est soz-diacre, et se marie, doit remanoir o sa feme, et perdre le bénéfice de s'iglyse ; et clerc soz-diacre qui se marie doit sa feme lessier.

§ 2.

Nul clerz mariez ne doit estre pris à governer yglise, s'il ne voe continence, et cel qui n'a eu que une fame et pucele4.

[p. 327] Enten que nus mariez ne doit estre prestres, s'il n'a eu que une feme et pucele.

§ 3.

Se acolitre se marient, et ont bénéfice d'yglise, il ne le puent tenir, car il ne puent estre environ auter (autel) por l'ordure ; et s'ont riens doné à iglyse, il le doivent avoir, porce qu'il sont hors d'iglyse5.

Enten ausit com l'en dit ordure, est de henté (hanter) à sa feme.

Mès enten que quant à servise d'yglise, et qui bénéfice pert, pert l'ofice.

Et cil qui se part d'iglyse, ce que il dona il doit avoir, et c'est voirs, quant il se part par l'autorité au juige, non pas por sa colpe.

§ 4.

Cum uns clerz fust mariez, ses évesques le forçoit porter corone ; par quoi il se plaint le roi, qui dit : Comme clerc mariez ne se puisse joïr de previliége de clerc, et il li conviegne fere totes les choses par quoi il plese à sa feme, et convient qu'il soit ententis ès choses del monde, il ne doit pas estre forciez de porter corone, por plere à sa feme ; car lede chose a en la tonsure et en la roigneure6.

Enten que clerc mariez ne puet avoir priviliége de clerc, ne l'en ne le puet forcer de porter corone.

§ 5.

Uns clerz estoient en une terre, qui ne portoient pas corone, qui se marioient, et que l'en ne lor deffendist7 lor servise qu'il devoient, il prenoient corone arrière, issint conchioient lor seigneur de ce qu'il devoient.

Et uns autres estoient qui se marioient, et portoient corone por tolir à lor seigneur lor droitures et lor seignories.

Li rois dit que il viaut que tex genz soient josticié, et qu'il soient mis en ort lieu, et en mauvès, s'il ne se volent chastier8.

§ 6.

Enprès l'en dit que évesques ne puet lessier sa citié, ne aler aillors por i remanoir. Et s'il le fet, li rois puet fere prendre toz ses biens tenporex, jusque il soit venuz à amendement.

§ 7.

Li rois dit aissint que à cex soient donées les provandes et les iglyses, qui servir les puissent. Et qui issi ne le fera, l'en prendra les biens tenporels en sa main.

§ 8.

[p. 328] Enprès il commende que clerc qui laisse à servir sanz droite cause, que l'en praingne totes ses choses tenporelx9.

§ 9.

Clerc ne doit mie avoir chose d'iglyse, s'il ne désiert ; et por ce furent-eles donées. Et priviliége donez contre ce ne doit tenir, fors en cas, c'est à savoir se aucuns est enpeechiez par droite cause, por quoi il ne le puisse fere10.

§. 10.

Enten qui chastie les félons et les mauvés, il ne fet pas contre loi.


1 DECRETALIUM D. GREGORII PAPÆ IX, lib. 3, tit. 3, De clericis conjugatis.
2 Infrà.
3 Decret. Greg. IX, lib. 3, tit. 3, cap. 1.
4 Nisi forte castitatem voveret perpetuant, et qui unicam et virginem habuisset uxorem ; ibid., cap. 2.
5 Decret. Greg. IX, lib. 3, tit. 3, cap. 3.
6 Ibid., cap. 7.
7 Pour qu'on n'exigeât point d'eux,...
8 Décret. Greg. IX, lib. 3, tit. 3, cap. 9.
9 Decret. Greg. IX, lib. 3, tit. 4 : De Clericis non residentibus in ecclesia vel prœbenda, cap. 1, 4, 6.
10 Ibid., cap. 10.