VI. De force commune [rubr.]

Marciaus dit : cil est tenuz par la loi que Julius fist de force commune qui a en sa meson ou en son champ armes ou darz, fors celes que il doit avoir quant il va chacier, ou quant il erre, ou quant il va par mer.

Scevola dit : les armes en sont exceptees que aucuns a quant il se remuee ou quant el i sont acheetes par heritage.

Marcians dit : en cele meisme cause sont cil qui ont pris consoil de fere dissession et ont sers ou franc homes armez. ¶ {1} Par cele meisme loi est cil tenuz qui est en commun leu o armes. {2} En ceste meisme cause sont cil qui ont assenblé gent por assaillir villes et ont pris par force d’armes les choses qui i estoient. {3} Et cil i est tenuz qui de feu ravist aucunne chose, fors ce de quoi la meson estoit fete. {4} Et cil qui prant par force enfant ou feme sera puniz par la poine de ceste loi. ¶ {5} Cil qui vient au feu o glaives o ou armes por ravir aucunne chose, ou por deffandre au seigneur de la meson que il ne sauve sa chose, est tenuz par la poine de ceste loi. {6} Par ceste meisme loi est tenuz cil qui o homes armez met aucun hors de la possession de sa meson ou de son champ.

Ulpians dit : ou qui preste ses homes à ce fere.

Marceans dit : cil qui met le feu en une meson par dissession, ou qui i enclot un home per tricherie, ou qui fet que uns morz ne soit pas enfoiz et que sepulture ne li soit fete, ou qui oblige à soi aucun home par force, est tenuz par la poine de ceste loi. ¶ {1} Se l’en plede de force qui a esté fete et de la possession et de la seignorie de la chose où ele a esté fete, li enpereres Pius escrit que l’en doit avant enquerre de la force ou de la proprieté de la chose ; mes il n’i a que l’en enquere avant de la force que de la droiture de la seignorie ou de la possession. ¶ {2} Cil qui a pris par force feme ma[192vB]riee ou desmariee est puniz par trop grief torment ; et se li peres à la feme est tant priez que il quite ce qui li apartient, uns estranges le porra acuser sanz doter excepcion de .v. anz ; ¶ car li crimes de prandre feme à force passe celui d’avotire.

Cil meismes dit : li enpereres Pius escrit en cez paroles que cil qui doit estre puniz qui ravist enfant qui est naturelment frans : « je sui meüz par la conplaince qui estoit contenue ou libelle que Selvains me bailla, par coi il sennefia que ses filz qui estoit naturelment franc avoit esté raviz et enclos et batuz à desmesure. Et por ce, Germain biaus tres chiers amis, je voill que tu l’oïes ; et se tu aperçoiz que il soit issi, tu en preignes grief vengence ».

Cil meismes dit : cil est tenuz par la loi que Julius fist de commune force qui estoit en aucunne baillie ou aucunne poesté et ocist ou bati un des citaiens de Rome, ou commenda que aucunne tel chose li fust fete, ou que il fust liez ou tormentez. Ce meisme apartient as legaz et as avocaz et as contes se aucuns d’aus est repris que il les ait botez ou fet leur tort.

Marcians dit : il est contenu en loi que Julius fist de force commune que nus ne lit ne n’enpeeche celui qui est acusez que il ne puisse aler à Rome dedanz un certain tens.

Paulus dit : nos apelons armz non pas tant solement cez qui o‹nt› glaives mes cez qui on‹t› autres choses de coi l’en puet mal fere.

Ulpians dit : cil est tenuz par la paine de ceste loi, qui fet par force et par tricherie que juigement ne sont pas fet seurement ou que li juige ne juigent si comme il doivent, et cil qui font par force que aucuns leur promet deners ou communement ou priveement, et cil qui par tricherie est armz la où l’en fet juigement. Cil en est exceptez qui por chacier a assenblié homes armz qui se conbatent as betes, car ce li est bien otroié. ¶ {1} Cil est tenuz par ceste loi qui a assenblé homes par batre aucun par force ; et ja soit ce que cil qui est batuz ne soit pas ocis. {2} Neporquant, l’en deffant à celui qui est dampnz de force commune la commune de feu [193rA] et d’eve.

Paulus dit : cil qui usent mesons ou viles sont puni par force capital se il le font o homes armz. ¶ {1} Par non d’armes sont apelees totes les choses par coi aucuns puet mal fere. ¶ {2} Il ne senble pas que cil qui porte armes por soi deffendre les port por homes ocerre.

Cil moismes dit : cil qui demandent noviaus paages sont tenu par la loi que Julius fist de force commune.