XI. De forfez de jeu de dez1.
§ 1.
Li rois dit que se aucuns bati celui à qui il joet as diz, por acheson del jeu, il n'an fera jà droit, mès l'en doit prandre garde par quel chose ce a esté ; et se ce a esté por chose qui vaille, l'en en doit bien fere droit, se li joeor s'entretolent aucune chose qui soit del jeu, li [p. 326] rois aura auction de la chose tolue ; mès il n'an auront point, car il n'en sunt pas digne2.
§ 2.
Et nos devon entendre la meson, et por lieu et por habiter3.
§ 3.
Ce que l'en joe por metre maintenant en mangier est bien soffrable4.
§ 4.
Se menor qui n'est pas bien encor en son poer, ainz est el poer à celi qui l'a en garde, joet as diz : et por ce, cil qui l'a en garde puet redemender. Ausint puet l'en del serf qui est en la garde son seignor5.
§ 5.
Car matire de jeu vient de covoitisse, ne bons de haage ne puet apeler autre de qui (de ce qu'il) ait à lui joié, par ce qu'il pert sa digneté de demender en ce qu'il joe à lui.
§ 6.
Li tutors pot demender por le menor, et prover par garanz, car en tel chose n'a point de bataille.
