« Universis presentes litteras inspecturis, Hubertus, decanus Sparnonis, salutem in Domino. Noveritis quod Johannes de Boscho, miles, et Eufemia, mulier, uxor ejus, recognoscentes in jure coram nobis defunctum Robertum, quondam dictum Brulart, de Houvilla, vendidisse, dum viveret, priori de Metenone quamdam domum quam habebat apud Houvillam, sitam in censiva dictorum Johannis et Eufemie ut dicitur, cum platea sive curia dicte domui adjacenti, sicuti possidetur infra ambitum seu clausturam murorum et predictum Robertum se desessivisse tanquam de venditione in manu dicti militis de predictis domo et platea. Que videlicet domus et platea movent de hereditate sua de matrimonio dicte Eufemie, ut dicitur. Ipsi Johannes et Eufemia laudaverunt et voluerunt et ratam habuerunt dictam venditionem coram nobis, et priori et monachis de Metenone dictas domum et plateam concesserunt pacifice possidendam et tenendam (sic) in perpetuum pro duodecim denariis censualibus Carnotensis monete, dictis Johanni et Eufemie, vel eorum heredibus, a dictis priore et monachis, vel eorum mandato singulis annis apud Houvillam, festo sancti Remigii persolvendis. Et de predictis domo et platea investivit et sessivit dictus Johannes, miles, priorem de Mestenone tanquam de venditione coram nobis. Dederunt insuper dicti Johannes et Eufemia fidem in manu nostra, videlicet dicta Eufemia de Mandato, assensu et voluntate ipsius Johannis, quod contra venditionem predictam non venient in futurum. Immo dicto priori et monachis predictas domum et plateam garantizabunt bona fide tanquam domini censuales Johannes, filius primogenitus dictorum Johannis et Eufemia, laudavit, voluit et concessit coram nobis venditionem supradictam ; promittens fide media quod non aliquid de premissis per se vel per alios de cetero non venire ; immo, etc.... In cujus rei testimonium, ad precem dictorum Johannis, militis, et Eufemie uxoris sue, et Johannis filii eorumdem, fecimus presentes litteras sigillo nostro sigillari. Actum anno Domini millesimo CCºXCº septimo. »