I. Ci commence li livres d’Enforçade. Ci titres est li quel puent fere testamant et comant testamanz doivent estre fez [rubr.]

Ulpianus dit : testamanz est droite sentence de nostre volenté de ce que aucuns velt qui soit fet aprés sa mort.

Labeo [108vB] dit : il convient regarder en celui qui fest testamant non pas à la sentence do cors, mes à l’enterineté de la pensee.

Ulpianus dit : fere testamant n’est pas de privé droit mes dou commun.

Gaius dit : se nos demandon se testamant vaut, nos devons premierement enquerre se cil qui le fit avoit poer de fere testamant, et aprés se il le fit selonc les regles de droit citeen.

Gaius dit : voions en quel aage li home et les femes poent fere testamant. Et il est voirs que l’en doit atendre es homes tant que il aeent .xiiii. anz et es femes tant que eles aent .xii. Veons donc s’il convient que aucuns ait passé .xiiii. anz à ce que il puisse fere testamant, ou se ce est assez que il les oit acompliz, si comme se il fut nez es kalendres de jenvrer et il fist testamant à cez jorz meisme au chief de .xiiii. anz. Et ge di que li testamant vaut ; et encor di ge, plus que se il le fist le jor devant les kalandres aprés la siste eure de la nuit, li testamant vaut ; car il senble ja que il acompli les .xiiii. anz, si comme il plet à Marcian.

Gaius dit : cil qui est en la poesté son pere n’a pas poer de fere testamant ; mes se aucuns asordist par maladie ou par aucunne aventure puis que il a fet son testamant, por ce n’est pas li testamant quassé.

Marcus dist : se li muz ou se li sorz a enpetré vers l’enperere que il li loise à fere testamant, li testamant vaut.

Gaius dit : li testamanz que aucun fet tant comme il est en la poeté à ses amis ne vaut rien, ja soit ce que il remaingne. ¶ {1} Se la communeté de feu et d’eve est deffendue à aucun, li testamant que il fist avant ne cil que il fet aprés ne vaut rien, car li bien que il avoit quant il fut dampnz seront popliez, ou il seront lessié à ses creanciers. {2} Cil qui sont envoié en une ille en essill sont en cele meisme cause ; {3} mes cil qui sont envoié en essil, à qui la terre de Lombardie et lor contree est deffendue, retiennent lor droiture de fere testamant. {4} Et cil qui sont condampné à fer ou à bestes ou à metal perdent franchise et lor bien sont poplié ; et par ce apert il que il perdent le poer de fere testamant.

Ulpianus1 dit : se aucuns a esté acusez et muert en prison ainz que il soit dampnez, si testamanz vaudra.

Paulus dit : cil qui a perdu les mains puet fere testamant, ja soit ce que il ne le puet escrire.

Ulpianus dit : ostage ne poent fere testamant se il ne lor est otroié [109rA].

Julianus dit : li testamanz à cez qui sont mort en la poesté à lor ennemis2 sont confermé par la loi que Cornelius fit, autresi comme se cil qui les firent ne fussent onques venu en la poeté à lor anemis et lor heritage apartient à cez de qui il firent lor hers. Le sers de qui cil qui morut en la poesté à lor annemis fist son heir sera frans et hers, voille ou ne voille, ja soit ce que l’en ne die pas propremant que il soit heirs necesseres ; car li fiz à celui qui morut en la poeté à ses ennemis est obligiez à l’eritage maugré son, ja soit ce que l’en ne puisse pas dire que il soit propre heirs desque il n’estoit en sa poesté quant il morut. ¶

Marcianus dit : cil qui sont pris de larrons poent fere testamant por ce que il sont franc. {1} Et cil qui muerent leument entre estrange gent puent fere testamant. ¶ {2} Se aucun fut dampnz de crime capital, et il apela et il morut ainz que li apiax fut examinez, le testamant vaut.

Paulus dit : se cil qui fut franchi ou testamant son seignor ne sot pas que sis sires soit mort et que sis heritages soit receuz, il ne puet fere testamant, ja soit ce que il soit frans et hors d’autrui poesté ; car cil qui n’est pas certains de son estat ne pot pas fere certoine loi en son testamant.

Ulpianus dit : cil qui dotent de lor estat et qui en sont en error ne poent pas fere testamant, si comme li enpereres Pius dist.

Ponponius dit : li fiz qui est en bau et autrui serf et cil qui est au ventre sa mere et li sorz poent partir an testamant ; car ja soit ce que il ne poent fere testamant, neporquant il poent aquerre par testamant ou à aus ou à autres, si comme Marciaux dit. ¶ {1} Li forsenez puent partir en testamant, ja soit ce que il que il ne puet fere testamant3. Il puet partir ou testamant por ce que il puet aquerre les testamanz, car personex aucions sont aquises à cez qui sont de saine pensee, ja soit ce que il n’en sevent rien.

Calistratus dit : cil qui chiest en frenesie par maladie ne pot pas fere testamanz en cel tens. ¶

Ulpianus dit : cil à qui ses choses sont defendues par la loi ne pot pas fere testamant ; et s’il le fet, il ne vaut rien. Mes cil que il fist devant, ce vaudra ; il ne porra pas estre apelez à estre tesmoing do testamant ‹desque il ne puet fere testament›4. ¶ {1} Se aucuns est dampnez que il eit fet libelle por diffamer [109rB] autrui, il est contenu au conseil au senat que il ne puisse fere testamant ; il ne pot donc fere testamant ne estre tesmoing do testamant.

Modestinus dit : se li fiz ‹qui› est5 en bau, ou uns orfelins ou un serf, fet les tables de son testamant et il les seele, la possession de ses biens ne puet pas estre donee selonc cez tables, ja soit ce que cil qui estoit en bail en soit hors quant il muert, et li orfelin eit passé .xiiii. anz et li sers soit franchiz. Car les tables do testamant ne sont nules que cil a fetes qui n’avoit poer de fere testamant.

Ulpianus dit : cil qui est fez heirs ou testamant ne pot pas estre tesmoinz en cet testamant. Mes il est autrement en celi à qui un lés est fez et en celui qui est fez heirs en un pou de chose por soi ; car cist poent bien estre tesmoing se autre chose ne lor tost, si comme se il sont dedanz aage de .xiiii. anz ou en la poesté à celui qui fist le testamant. {1} La parole de « poesté » ne doit pas estre raportee à ses enfanz tant solement mes à celui que aucuns a racheté de ses ennemis, ja soit ce que il n’est pas sers, ainz est obligiez tant que il rende le pris. {2} Encontre ce, puet l’en demander se li peres à celui qui puet fere testamant do chetel que il a conquis par chevalerie pot estre tesmoinz en son testamant ? Et Marciaux escrit que oïl bien ; donc en pot ses freres estre tesmoinz. {3} Ce que nos avons dit de cez qui sont en bau, qui ne poent porter tesmoin en testamant, doit estre entenduz en toz tesmoinz de cez par qui aucunne chose est aquise. {4} Forsenez ne puet6 estre tesmoing de quoi il n’est ordinoires de sen pensee ; mes se la forsenerie l’entrelesse en aucun tens, lors puet estre tesmoing ; ‹et li testamenz›7 que il parfist8 devent la forssenerie veudra ; et la possessions des biens en porra estre demandee. ¶ {5} Je croi que cil qui est dampnez à rendre arrieres ce que il a pris en sa baillie ne pot estre tesmoing ou testamant, car il i est vee que il ne soit tesmoinz en nule cause. {6} Feme ‹ne› pot9 porter tesmoinz en testemant, mes en autres cas pot feme porter tesmoing. ¶ {7} Serf ne doit estre receuz par droit en nul sollenpnel fet, car il n’a nule communauté en droit citain. ¶ {8} Li ancien distrent que cil sont apelé à fere testamant por acomplir la sollenpnité, il doivent estre tant que il soit toz perfez. {9} Neporquant, [109vA] il ne convient pas que il entendent les paroles ; issi l’escrit li enperes Marc à Julian qui ne savoit pas parler en latin, car c’est assez se il reçoit le sanz de la chose por quoi il fu apelez. {10} Et se li tesmoing i sunt apelé ou detenuz par force, lor tesmoing ne vaut rien.

Cil meismes dist : li heir deivent estre nomé en apert si que l’en le10 puisse oïr ; il loest donc à celui qui fet son testamant que il les nomme ‹ou que il les escrive ; mes se il les nomme›11, il les doit nomer apertement. Apertement n’est pas en commun, mes se que il puisse estre oïz. Et si ne convient pas que tuit l’oïent, mes cil qui i sunt amené por estre tesmoingz ; et s’il i a plusors tesmoinz, c’est assez que li sollenpnex numbres l’oïe. ¶ {1} Se aucuns velt müer aucunne chose puis que il a fet son testamant, il li convient tot fere de rechief. ¶ Se aucuns nome ou escrit aucunne chose oscurement en son testemant, l’en demande s’il la puet esclerier aprés ce que la sollenpnité do testamant est aconplie. Si comme se il avoit plusors sers et il en lessa .i., ne il n’esclera pas le quel il lessa ; ou se il lessa une chose12 à Tyce et il avoit plusors amis qui avoent non Tyce ; ou s’il fu deceuz ou non ou el seurnon13 et il ne fut pas deceuz ou cors. Et ge cuit que il ne puet bien esclerer, que il ne done rien, ainz esclere à qui il l’a doné. ¶ Et s’il met aprés aucunne quenoissence et il mostre ou par paroles ou par letres la summe do lés ou le non de celui à qui il le lesse ou la qualité de la chose que il lesse, l’en demande se il fet à droit. Et ge croi que il puet nomer la qualité de la chose ; car s’il ne la nomoit, il convendroit regarder ou as autres escritures ou à la costume à prodes homes ou à celes de region14. ¶ {2} Et testamanz en quoi tesmoing solent estre apelé por porter tesmoing, ‹il nos plest que cil qui i sont apelé por autre chose ne soient pas soffisant à porter tesmoign›15. Et ce doit estre issi entendu, que ja soit ce que il soient apelé por autre chose, neporquant, se il lor est dit ainz que l’en face le testamant que il soient comme tesmoinz, il poent por droit porter tesmoing. {3} Il convient fere testamant tot ensenble, si que il ne face en nu leu nule autre chose ; mes se l’en fet en aucunne ‹chose› qui apartiegne au testemant, li testamanz16 n’est pas failliz. Entre [109vB] lés et testamant n’a differance fors en ce que testamanz est fez generaument et lés si est fez especiaument à certoine persone.

Cil meismes dit : je et mis peres et plusors autres qui sont en une meisme poeté poons estre conté ou numbré des tesmoinz qui sont apelé au testamant. {1} Nos devon regarder la condicion des tesmoinz quant il seelent et non mie quant cil muert qui fet le testamant. Se il estoient ‹donc receu›17 quant il seelerent le testamant, dou quel il pensent estre receu en tesmoing, chose qui puis soit avenue18 ne lor nuist point. ¶ {2} Se ge ai pris de celui qui fist le testamant son seel et je en ai seele le testamant, autretant vaut comme se je seelasse d’un autre. ¶ {4} Se aucuns des tesmoinz n’escrit pas son non ou testamant et il le seele, autretant vaut comme se il n’eust pas esté apelez à tesmoing ; et s’il met son non, ausi comme plusors font, et il ne le seele pas, encor diron nos ce meisme. {5} L’en demande se nos devons seeler d’un anel tant solement ou d’aucun autre signe. Et sanz dote li home seelent en diverses manieres, mes il est melz que aucun puisse seeler de son anel tant selement qui ait aucunne empreinte. {6} Il n’est nule dote que testamant ne puisse estre seelé par nuit. {7} L’en doit dire que les tables sont seelees ‹se li dras est seelez de quoi eles sont covertes›19.

Se li testamanz20, que cil qui le fist resigna, est seelez de rechief des seaus à .ii. tesmoinz, il est parfez et vaut par le droit citeen, et par celi au prevost.

Lorentius dit : aucuns puet seler .i. testamant de plusors essemples ; et aucunne foiz est ce necessere chose, si comme quant aucuns velt aler hors do païs et il velt porter o lui son testamant et lessier le en sa meson.

Jabolinus dit : se cil qui fesoit son testamant nomma ses premiers heirs et il mori ancois que il nommast les segonz, l’en ne doit pas dire que il ait fet son testamant mes que il l’a commoincié ; cil qui furent nommé ne seront donc pas hoir21 por ce testamant. Et Labeo dit que c’est voirs se il est certaine chose que cil qui fist le testamant vossist fere plus de heirs ; et ge croi que ce soit li droiz entendemanz.

Gaius dit : quant il commande par la loi que aucuns ne ait pas poer de fere testamant, ce est à dire que sis tesmoinz ne soit [110rA] pas receuz et, si comme aucun quident, que nus ne port tesmoin.

Celsus dit : Labeo mande saluz à cez. Je te demande se cil doit estre contez ou numbre des tesmoinz qui fut amenez à escrire le testamant et puis le seela quant il l’ot escrit. Celsus mande saluz à Labeo. Ou ge n’entant pas que cil est de qui tu demandes, ou ta demande est fole, car ce est folie de doter se aucuns doit melz estre tesmoinz que cil qui escrit les tables do testamant.

Modestinus dit : il n’est pas devee que autrui serf ne puisse escrire testamant par le commandemant à celui qui le fet.

Paulus dit : por l’escriture qui estoit appareilliez à fere testamant, ne puent pas lés etre demandé se li testamanz ne fut parfez.

Cil meisme dit : il convient que chescuns des tesmoinz qui sont apelez à fere testamant escrire en son propre cyrografe que li testamanz est que il a seelé.

Cil meisme dit : li bien à celui qui se vanta que il feroit de l’enpereor son heir no doivent pas por ce estre pris en la main l’enpereor.