École des chartes » ELEC » LI DOUZIESME LIVRES » XXII. Comment l'en doit prendre home de fié.
[p. 254]

XXII. Comment l'en doit prendre home de fié.

§ 1.

Qui prent homenage, le doit prendre issint : Cil qui requiert doit joindre les mains et dire : Sire, ge deviens vostre home de bal, se c'est bal, ou de héritage, se c'est héritage ; que ge foi et léauté vos porterai, comme à mon seignor ; et devien vostre homme à teles redevances comme le fiez aporte. Et li sires doit respondre : Et ge vos recef à home ; que ge foi vos porterai, comme à mon home ; et vos en bese en nom de foi ; et doit dire de bal ou d'éritage.

Se aucuns a son droit par avenue, par escheete ou par bail, par don ou par achat, ou par autre droite cause, l'en le doit recevoir porquoi [p. 255] il ait passé vingt anz. Et si puet li sires prendre à home celui qui n'a que quatorze anz, et fere li indulgence, porquoi ce ne soit fet en grevance d'autrui.

Nus ne doit prendre à home home, tant comme cil vive qui est en sa foi, si n'est par son congié, ou se droiz ne l'i amoine.

L'en doit prandre feme à feme : car a (elle) pot fere par autre ce que ele ne puet fere de soi.

Quant aucuns demende escheete o aucune, et requiert que l'en le preigne à home, et dit que cil est morz qui tenoit : il qui requiert doit prover la mort par devant le seignor do fié, et qu'il est li plus près. Et il doivent estre mandé li rière vavassor qui tenoient do mort, por voier les proves ; et s'il est vis, il doit venir avant, et se doit désesir. Et se aucuns revient (ne vient) avant, enprès mort et enprès désesine, dedanz quarante jorz, l'en sésira celui qui vendra avant, aprovant le lignage, s'il n'i a renable contredit.