§ 1.

Aucune foiz est li héritages donez à celui qui est conquis en servage, si comme se il est nez puis que l'en a demoré à doner à la feme franchise qui li fut lessié, et se il fut nez puis que sa mère fut franchie, jà soit ce que il fut conceuz en servage, il sera receuz en son héritage, segont les lois2.

Se li fiz fut conceuz en chetivesons, et il (i) fut nez, et il en revient ou sa mère, il sera receuz à l'éritage par ce consoill. Et se li fiz estoit frans quant sa mère fut morte, et il fut ramenez en servage ainz que il receust l'éritage, li héritages ne vient pas à lui par ce consoill, neis se il fut puis franchiz, se il n'a restrinction (restitution) par le bénéfice le roi3.

Et se li fiz est trez dou ventre sa mère puis qu'ele est morte, l'en doit dire qu'ele (qu'il) aura son héritage, et pot demender la possession des biens4.

Cil qui est dampnez de crime capital, si comme des cinq granz meffez, si comme de murtre, de rat, d'omicide, de traïson, ne pot demender l'éritage sa mère ne son père5.

Amenuissement de chief qui vient sauf son chetel, sauf la cité, ne nuit rien à avoir l'éritage6.

Se cele qui est moite avet un prochein parent et un fiz, et tandis com li fiz se consoloit de recevoir l'éritage, li procheins parenz morut, et après le fiz refusa l'éritage : l'en demende se li fiz ou coisin aura l'éritage ? Et l'en respont que li plus près paranz le doit avoir7.

§ 2.

Cil meismes dit : Se la mère a esté franchie, o ele est naturelment franche, ele aura le prou de ce consoill, qui donne au père ou à la mère l'éritage à ses fiz. Nos apelons fiz ou filles cez qui sont nez de léal mariage8.

[p. 251] Mè se li fiz et la fille avoit plus de vingt-cinq anz, et le (se) s'offrirent à vandre por estre parçoner do pris, et il sont puis franchi, la mère ne pot pas chalongier l'éritage, selonc droit ; car elle lesse à estre lor mère, et issint le dit li évesque Guillerme9.

Et se ele conçut un fil en servage, et ele enfante puis qu'ele est franchie, ele sera receue à l'éritage à son héritage (fils), segont le droit. Autresint est-il, s'ele conçut quant ele estoit serve, et enprès fut franche10.

Et s'ele estoit franche quant ele conçut, e après fut amenée en servage ele enfanta, et puis fut franchie, ele sera receue à son héritage, segont droit11.

Et se ele estoit grosse quant ele fut franchie, l'en doit dire que ce li doit valoir ; et ele sera receue à l'éritage son fil qui fut nez en servage, si comme si franchise li fut lessie, et l'en demora à doner li, et ele enfanta dedanz ce ; ou s'ele estoit en chestivoisons, et li enfes s'en revint avoc (avec) li, hons (ou) s'ele enfanta puis qu'ele fut rachetée12.

Se la possession des biens est donée à un forsené, et il muert ainz que il reviengne en son sen, et il let la possession des biens, ce ne nuira riens à la mère ne au père au mort13.

§ 3.

Cil meismes dit : Se la mère muert, il (est) droiz que li enfant aient son héritage.

§ 4.

Cil do premier mariage (auront) quanquez ele avoit au jor qu'à li assembla, et qu'ele conquist, et qui li avint, et qui li eschet, dom (dont) ele ert sésie au jor14. Cil do segont mariage auront les escheetes et les conquez, et cez qui seront ou segont mariage avenuz ; et issit en consiuance, par toz les mariages. Et vet ausi de vilenages. Et li droiz de l'ostel le roi i apela toz les enfanz iuiement à l'éritage lor mère. Do père vet autrement des fiz, en la cité d'Orliens ; mès de vilenages vet ausint comme nos avons devant dit.

De fiez15. — Li premers enfant de celui auront la moistié de quanquez il a au jor qu'il se marie, par la reson do doere lor mère. De la moistié [p. 252] il doera sa feme segonde, et des conquez fez en sa vie, et des eschoetes, et des avenues, et de sa part des conquez fez ou premier mariage. Et ce auront li enfant do segont mariage, et les escheetes en celui tens, et les conquez ; et issint par toz les heirs en consiuance.

§ 5.

Se aucuns a vilenage, et il et sa feme marie ses enfanz à aucuns, et aucuns remeigne avec le père ou avoc la mère, et il i eist part d'éritage : cil qui remaint en la sele (cele) aura tot ce que père et mère aura, par queque manière léial il li viegne. Et ce est ausint en fiez et en vilenages ; car quantque père et mère fet, si est estable.

§ 6.

Conquez que aucuns fet, soit en mobles ou en héritages, si vient au plus près.

§ 7.

En fiez li ainznez a la mestié toz sos, si sont plus de deus ; et s'il sont dui, il a les deus parz, et le mellor herbargage, et a un arpent de porpris. Filles sont totes iues en escheetes et en avenues, fors tant que li ainznez a le meillor herbergage. Et les autres si prennent enprès tuit ensemble un herbergage, et chescun en doit avoir la soe partie.

§ 8.

De baronie vet autrement : car baronie ne puet estre desmembrée ; mès li sires de la baronie doit fere avenant au frères et as sors des terres de la baronie, et autres choses, s'il les a. Et s'il i a dui baronies ou trois, ce sera parti segont la nature des fiez, sanz baronie desmembrer. Jà soit ce que li ainznez n'aura pas totes les baronies, ne n'est pas à son chois ; car qui la vodra avoir fera avenant as autres.

§ 9.

Il convient voer se li fiz qui disoit qu'il ne voloit pas recevoir l'éritage la mère, puet muer sa volenté à recevoir le, ainz que uns des paranz l'ait receu. Car les paroles qui sont dites, se un des fiz ne reçoit l'éritage, ces paroles s'étendent molt ; et por ce qu'eles s'atendent, il se puet repentir jusque un an ; car la possession au fiz pot estre demendée jusques à un an16.

§ 10.

Il est contenu en l'establissemant au prévoz, que li héritage à la mère, qui mort sanz testament, apartient as enfanz17.

§ 11.

Cil muert sanz testament qui ne fet point de testament, ou qui ne le fet pas par droit ; ou quant cil que il avoit fet par droit est roz ou vains ; ou se nus n'est heirs par ce testament18.

[p. 253] Li héritages à cez qui morent sanz testament apartienent à lor fiz et à lor filles, et à lor coisinance19.

§ 12.

Et avon commendé que se aucuns a pris feme en sa compoignie, eu au comoincement corage de fere mariage, neporquant ele estoit tele que il la poet bien avoir par mariage, et il en a puis fiz ou filles : cil qui sont nez après ce que li mariages est parfez ne soit pas tant solement léal, mès qui furent devant nez, qui donèrent le commoincement do léal nom à cez qui vindrent après. Et nos avons juigié que ce soit tenable, se li enfant sont en garde (engendré) ou nez après ce20 ; et soient apelez à l'éritage do père et de la mère, et ait quant as choses espérités, et non as temporés.

§ 13.

Li paranz au père soent apelez à l'éritage au père, li plus près ; et cil à la mère, à l'éritage à la mère.

Et doit li héritages aler par le couté (côté) don ele muet. La mère et li pères sont heirs au fiz an mobles et en conquez, et en ce qui muet d'aus ; et li prochein enprès.

§ 14.

Se aucuns marie, et sa feme ensemble, deus de lor enfanz, et un en remaigne, et li pères muere ; et en sa vie la mère marie le tierz, et face retenue de ses biens, et enprès muere : la retenue sera as enfanz derrenier.

§ 15.

Nos ne fesons pas ce contre le veil droit, mès por confermer le : car li uns des heirs sont fet par testament, et li autre sanz testament. Car en cez qui sont procheins apartient l'éritage sanz testament, et as autres par testament.

§ 16.

Nul ne pot trespasser ses heirs, en son lit mortel, en son héritage qu'il a d'avenue ou de eschoete. Mès nus ne doit ne ne pot recevoir héritage, s'il ne fet gré as créanciers, et doit garder le testament qui est à droit fez.

§ 17.

Il n'est pas dote que l'en ne puisse bien demender la possession des biens à l'enfant qui fut morz ainz qu'il poist parler.

§ 18.

Menor de quatorze anz (qui) ne pot demender la possession des biens dedanz le tanz qui est establiz, n'i pert riens.

Ausi comme nos ôtons conchiemenz et voines paroles, ausi commendons-nos [p. 254] que ce soit tenu que s'il velt demender l'éritage, auge l'en au juige, ou as autres, s'il i ont baillie, selonc ce que l'en a usé en l'ancien tens, par si que se oste plus la chose que l'en ne doit en metre en sésine, por ce ne remoigne pas que ne soit parfete en son leu.

§ 19.

A totes les foiz que plusors ont la possession des biens, quant il n'i a point d'escheeste, n'est pas dote que sa partie ne croisse à cez qui demendent, quant li autre riens n'i demandent.

§ 20.

Nus n'est forciez de demender les choses au mort par lignage.

Se ta mère est desvée, et ne demende pas, por sa deverie, la possession des biens son oncle, tu, qui es ses fiz, doiz estre receu à la possession des biens, selonc la forme de ce consoil.

§ 21.

Après ce nos atablisson que cil qui sont fet heir à aucuns, ou est heir par lignage, soif contrainz en totes manières d'acomplir ce que li morz commenda, se ce que il commenda s'acorde à droit, ou se aucune loi de terre ne vet encontre. Jà soit ce que heirs qui est chargiez de ce commendement ne le face pas, ainz a receu ce que fut lessi (é) à aucun, et est amonesté par le juige, et il atant jusque à un an qui no fet pas : il ait tant sanz plus comme droit li done, et li remananz soit toluz, et soit bailliez à autres.

Et se li morz n'a point de lignage, et il ait fet heir aucun, et li ait enjoint que il face aucune chose, et il ne le fet dedariz le tans establi, ce est dedanz un an : la chose li soit toloiste, qui li a esté donée, et viegne à la borse le roi ; et s'il a lignage, il i soit apelez li plus près.