IV. [111rA] Comment les tables do testamant doivent estre overtes [rubr.]

Gaius dit : li prevoz promet que il donra à toz cez qui vodront veoir et contre escrire les tables dou testamant poïr de voir les et contrescrire. Et il est aperte chose qu’i l’otroie à celui qui l’en demande, ou en son non et en l’autrui. {1} La reson de ce bannissement est tote aperte ; car la verité des plez qui nesset de testamanz ne porront pas estre legierement seue se l’en ne voit et savoit les paroles do testamant. ¶{2} Se aucuns renie son seel, por ce ne lesse l’en pas à ovrir les tables, mes eles sont sospeceusses.

Ulpianus dit : l’escriture do testamant n’apartient pas à l’oir tant solement mes à toz cez qui en doivent avoir aucunne chose, car communs estremanz. ¶ {1} L’en apele propremant testamant celui qui est fez por droit ; neporquant, nos apelons testamant cez qui seront runt, ou faus, ou vain ; et cez maisme, qui ne sont pas perfez, solons nos apeler testamanz. {2} Tout ce qui est fet por testamant, en quel maniere que il soit escrit, et qui contient derreniere volenté, apartient à cause de testamant ; et les principax tables et les segondes sont contenues ou banissement. ¶ {3} Se il i a plusors testamanz que aucuns velt que il soient porté avant, l’en li doit tot motrer. ¶ {4} Se l’en dote que cil soit morz ou vis de qui aucun demande que ce qui apartient à la cause de son testamant soit aporté avant et contre escrit, ¶ l’en doit dire que li prevolz en doit juiger quant il avra queneue la cause. Et se il a droites enseignes que il vive, il ne doit pas otroier que les tables soent veües, ne leues, ne seelees. ¶ {5} La veüe des ta[111rB]bles enporte que l’escriture soit leue. {6} Li prevoz ne soffre pas que li jorz en que les tables furent escrites ne li conseiller qui lors estoient soient veü ne contre escrit, que aucunne fauseté n’i soit fete, car la veüe pot doner matere de fere fauseté. {7} L’en demande donc se il le fet maintenant monstrer et contrescrire ou s’il doit doner terme. Et il est melz que termes soit donz selonc ce que li leu sont lonteing ou prochien. {8} Se aucuns ne renie pas que il n’oit les tables do testamant, mes il ne lor soffre pas que eles soent veües ne contrescrites, il doit estre contrainz de monstrer les ; et s’il nie que il ne les a pas, il doit estre envoiez à l’enterdit d’aporter avant les tables do testamant.

Gaius dit : li heirs puet chalongier les tables do testamant autresi comme les autres choses de l’eritage, et puet pledier por les fere venir avant.

Ulpianus dit : quant les tables do testemant devent estre overtes premierement, li offices ou prevost est que il face les seleors asenbler ensenble et quenoistre lor seal.

Paulus dit : ou renoier les, quar c’est li communs preuz que les derrenieres volentez as homes soent menees à effaut.

Ulpianus : mes se la greignor partie des seeleors est assenblee, li testamanz porra estre saelez et recitez par devant aus.

Gaius dit : mes se aucuns des seleors estoit hors dou païs, les tables do testamant li doivent estre envoies par reconoistre son seel ; car ce seroit grief chose de rapeler les par conoistre les, car il n’est pas droiz que aucuns ait domage en son office. Ne l’en ne fet pas force se li uns est hors do païs ou tuit. Et se tuit se deffallent por aventure et aucunne cause contraint de ovrir le testamant, li prevoz doit fere que il soit overz par devant home de tres bone renomee, et que il seelent quant il sera overz, et il soit envoiez la où li seleor seront, si que il reconoissent lor seaus.

Ulpianus dit : ja soit ce que il n’est pas escrit que les tables do testamant à l’orfelin ne soient pas overtes ; neporquant, se cil qui fist le testamant les lessa seelees par deors, li prevoz ne soffrera pas que eles soient overtes devant que la cause soit coneue.

Paulus dit : se feme est en possession ou non de ventre, les tables doivent estre overtes, si que l’en sache à qui li procuremenz est commandez. [111vA]

Ulpianus dit : se testamanz est escriz par dues essemplaires, se li quex que soit est overz, les tables sont overtes. {1} Se les tables sont overtes par leur nature, l’en ne dote pas que li testemanz ne soit overz ; ne l’en ne demande pas qui les a overtes. {2} Se les tables ne sont pas aparoissent ou eles sont arses, il convient secorre à cez à qui li lés sont lessié ; autresi comme quant eles sont seelees ou repotes.

Gaius dit : autresi comme l’en entant que li lés sont partie do testamant, senble il que les segondes tables soent parties des premeres.

Ulpianus dit : se aucuns a fet testamant quant li essampleres en est overz, li testamanz n’est pas encore overz ; mes se l’escriture autentique est overte, toz li testamanz est overz.