VII. Comment l'en doit recevoir home.
§ 1.
Se aucuns a eu (en) aucun héritage droit, par lignage, ou par achast, ou par don, ou par autre droite cause, l'en le doit recevoir à home, en fesant vers les seignors ce qu'il doit, tot ne soit-il d'aage. Mès se la chose est donée en non aage por grever aucun, comme de relevemanz ou d'autre servise, l'en no soffre pas. Mein morte ne doit tenir fié.
§ 2.
Nus ne doit prendre à home home, tant comme cil vive qui est en sa foi, se n'est par son gré, ou se juigement ne l'i met.
§ 3.
L'en doit prendre à feme feme : car ele pot fere par autrui ce qu'ele ne pot fere de soi. L'en doit prendre home por la reson do baill, s'il est li plus près de non aagé.
§ 4.
[p. 238] Quant aucuns demende achaeste, et dit que cil est mort qui tenoit, il doit prover la mort pardevant le seignor do fié, et qu'il est li plus près, et pardevant bones genz ; et doit bien li sires soffrir quarante jorz por voer se plus près vendra. Et se aucuns ne vient avant, il recevra celi qui ert. Et se aucuns ne se tret avant, et quarante jorz passent, li sires prendra son fié en sa main.
§ 5.
Si home est morz, sires pot bien asener as fruiz pandanz et à la terre dedans les quarante jorz ; mès por ce n'est pas sien se il prant, quant l'en fet ver li ce que l'en doit dedanz quarante jorz.
