§ 1.

Adam dit : Escheete qui vient de père au fiz, c'est li premiers, et est li plus près à avoir le que nus de la lignie. Et enprès li fiz do fiz, [p. 231] c'est li nevoz ; et enprès li soz-nevoz ; et enprès li fiz au soz-nevoz, et issint en coinsiguance jusques à sept degré ; car home ne puet pas plus vivre. Et de cest descendue nus ne rachète, et ne fet que prandre de seignor, gontes mains.

En montent, vet do fiz au père. L'escheete do fiz doit venir au père, se li fiz n'a enfanz ; et do fiz à l'eol et au beseol, et issint en conségance, giuque au sept beseaul ; et en ce n'a point de rachat. L'escheete do frère qui n'a enfanz, ne père, vient au frères des fiz, et non à la sor ; et s'il n'i a frère, au nevo, et au soz-nevo, et en consiguance jusque à vii degrez, si n'i a plus près.

§ 2.

Adam dit : L'en doit savoir que héritage et garde vient par droiture de lignage au plus prochein, pardevers père ou pardevers mère, à cele partie don la chose mot ; et li baillis li done la possession des biens1.

Nos apelons coisins toz cez que la loi apèle parenz de par père ou de par mère. Et tuit cil rachètent de escheete, et de ball. Droiture de lignage apartient as hers. Nessence de lignée vient par femes ; et cil sont frère qui sont nez de une mère, et non pas de un père2 ; et sont apelé à l'éritage à la mère, à tost le héritage do premier mariage ; et li segont a conquez et a l'escheete do segont mariage ; et les avenues qui vienent do premier mariage ou do segont, sont parties iuéement au fiez, saus l'énéence. Et en montent et en avalent, n'a pas rachez. Et tuit cil qui sont de un père, jà soit ce que il soit de diverses mères, sont frère de père. Li droiz apèle toz pères et mères, jusques au tierz genol, c'est au tierz ael ; et d'iqui en avant sont apelé greignors3

§ 3.

Li héritages do père que l'en porte ou premier mariage, li enfant de celui mariage ont la moistié, por le doere lor mère ; et cil do segont mariage, le quart de tot, por le doere lor mère ; et cil do tierz mariage ont le demi-quart de tot, por le doere lor mère ; et issint est en siuant. Et ce qui remaint, si est départiz iuéement en toz, sauf l'énéence. Ne en la terre au père ne pot avoir que une énéence, ne en la terre à la mère.

§ 4.

[p. 232] Les conquez que aucuns fet, et sa feme, sont as enfanz de celui mariage. Et se li hom a autre feme, il la puet doer ; et cil doeres sera patremoines as enfanz de segont mariage ; et ce qui remainst, c'est le quart, sera communs as enfanz do premier et do segont ; et de eschete aussint cele vaie meismes qui est devant dite.

§ 5.

De bau de fiz au père n'a point de rachat, ne de nevo à eol, et issint en siuent, en amontant.

§ 6.

Là ou il a garentie n'a point de rachat.

§ 7.

Quant feme a doere au fié, et li hers ne velt racheter, ne garentir le doere, la dame prendra do seignors ; e li sires aplètera (exploitera) la partie à l'eir por son rachat.

Quant frère et sor partissent, et li frères ne retient riens do fié, il ne garentira pas, ens prandra la sor dou seignor ; et se prant seignor, il rachètera.

An siure son fié n'a point de rachat.

§ 8.

Quant aucuns rachète aucune chose, si doit nomer quel chose il rachète ; et s'il ne rachète tot, li remenanz remaint encore à racheter ; car li nomemenz de la chose n'apartient pas au seignor. Et ce qui n'est nomé, li sires a les issues, se quarante jorz sont passé.

Nus n'entre en foi de chose donée à vie, quant la propriété ne li est otroïe, s'il ne plest au seignor.

§ 9.

Adam dit : Frères sont en segont degré d'omme. Quant aucun mort sanz heir, son patremoine vient au frères, et au sors non ; et doivent racheter, car la chose vient de costé ; et aussint quant la chose vient d'oncle à nièce, ou de nièce à oncle, ou de tante à nevo, ou de nevo à tente ; et ausi de coisin à coisin ou à coissine ; et issint est en ensiuant.

§ 10.

Adam dit : Frères ne rachète mie dou bau de ses frères. Li ainz-nez des frères, s'il est lai (lui) et autre, a les deus parz de la terre ; et si sont plus, la moistié ; il a la mellor herbergerie et un arpent por tot, et li autre ont tuit ensemble un herbergerie. Et se plus i a herbergages, il sont partiz iuéement as autres frères ; et s'il i a plus, il vient en partie as autres frères et à l'enné, san l'ennéence.

§ 11.

Adam dit : Frère ne rachate mie de la garde de ses frères ; ne sor, s'ele est sanz mari ; mès li mariz rachète le bau de la garde l'éritage de la feme ; non s'il i a heir de terre qui garentisse.

§ 12.

[p. 233] Une damoisele prent seignor ; si a terre qui vient de fié de son patremoine : l'en dit que sis mariz, qui la prent, ne rachatera pas, se ele a frère heir de terre, ne sis sires. Mès se li sires premers muert, et ele prange le segont seignor, il rachètera, tot i ait-il heir de terre. Quant feme a douze anz, et ele est mariée, le bal mort ; et veez la reson : li anciens droiz si est tex que feme n'ert à âge à terre tenir devant qu'ele fût mariée ; et por ce que li ami la tenoent tant à marier, por avoir le preu de la terre, mainz maus en sordoent. Et li rois Loys vost ci fere amendement, et establi, par général concire, que feme, puis qu'ele aroit quinze anz, fust hors de baill, et tenist sa terre. Jà soit ce que il ne mua riens de l'ancien droit an ce, que se ele ere mariée ou à douze anz ou à treze, que sis mariz eust sa terre délivre.

§ 13.

Un home ou une femesi mort, et a enfanz de segont mariage, et nevoz dou premier. Li nevoz demende l'eschoes dou premier mariage à la mère, et li enfant dou segont la demendent. Et l'en dit que li plus près prant ce an fié.

§ 14.

Quant garentie faut, l'en doit prandre celui qui fet la garentie à homage.

§ 15.

Oncles rachate le bau de ses nevoz, et des coisins l'un vers l'autre, et issi en coissinance.

§ 16.

Coisin germain rachate, et coisin do quint, et do six et do sept (degré).

§ 17.

Bau si ne dure que au tens jusques li heirs ait vingt anz et plus ; et quant il a passé tot le âge, et il ne prant de li, li sires pot assener à la chose por défaut de vavassor.

§ 18.

Père ne mère ne rachate pas do bau de ses fiz, ne ne puet l'en aler encontre, tant comme il vodra demorer ou bau son père ou sa mère.

§ 19.

Ennéence ne porte force en eschéete qui vient de costé, qui n'i soent iuel masle ; et femele n'i a riens, tant comme il eist masle. Et si li ennez mort ainz que il ait terre que li soit avenue, li einnez après aura l'ennéence. Entre femeles n'a point de ennéence.

§ 20.

En eschéeste de costé n'a point de ennéence ; tuit sont iuel. Et se l'ennéence est partie as autres, l'ennéence est morte quant as autres, et seront iuel et en eschéete et ou remanent.

§ 21.

Des baronies et des contéez vet autrement ; car la sole baronie [p. 234] n'est pas desmembrée, mès l'en fet avenant as menuez sor rentes ou sor terres, et la digneté remaint à l'ainzné ou à l'ainznée. Et s'il i a dui ou trois baronies, es sont départies sanz desmembrer.

§ 22.

Adam dit : Quanquez père et mère fet de ses choses resonablement au marier ses enfanz, est estable.

§ 23.

Se uns prodomes a trois fiz et deus filles, li einznez garantira, et n'i aura point de rachat, nais por les filles, se eles sont mariées, por ce qu'il i a heir de la terre. Et s'il n'i a se filles non, l'enné ne garentira pas do rachast.

§ 24.

Garentie vet juique à coisin remué de germain, et non plus.

L'en ne rachate pas de chenge but à but, mès s'il i a tornes, de tant i a los. L'en ne rachète pas de père. Ausint se aucuns demende une chose, et cil qui la tient por la pez en done un pou d'argent, ci n'a ne los ne rachat. Le (l'en) recheste de don de largece.

§ 25.

L'en ne rachète pas de restablissement. Se aucun dit en sun testament que sa chose soit donée por Dé, l'en ne rachète mie. Mès quant ele est livrée à celui qui ele est, et à qui ele doit estre en patremoine, s'il n'i a rachast. L'en ne rachaste mie de chose engagée. Home ne feme ne rachète mie do bau de ses enfanz. L'en ne rachète pas doere. L'en ne rachète pas de département. L'en ne rachète mie de partie.

§ 26.

Ne de mu, ne de sort, ne de desvé, ne de fo despendeor n'est pas rachastez, por quant s'il ont garde ; mès se l'en lor det le rachat, il le poent recevoir et demender.

§ 27.

Rachast si est tant comme la terre vaut de rente un an, et non plus. Home rachète, et feme, se li uns done à l'autre héritage. Ou (on) ne rachète mie de la mort de sa feme, tant comme li enfant sont en son baill.

§ 28.

Quant aucuns ne velt racheter et se marie, la chose remaint au seignor. Li sires ne pot prendre sor les rères-vavasors plus que li vavasors n'i prant.

§ 29.

Home rachète de l'eschaeste sa feme, et feme, enprès la mort son mari, rachète l'eschéete qui li est avenue ou tens do mariage.

§ 30.

L'en ne racheste pas de nul, se il n'est sires doù leu, et tel qui puisse recevoir homenage ; si comme l'en dit de régale et de ce cas semblable. Mès la sentence Goufroi de la Chapele est la plus veraie, [p. 235] qui dit que l'en doit racheter ; car les aventures que aviennent en celui tens sont do régale.

§ 31.

Dui frère d'un père et d'une mère sont ; lor père est morz et lor mère, et sont en aage. Li einznez prant sa terre do seignor, et li meinnez non. En ce il partissent, et avient tote la terre à la mère au meinné. Li sires done (dont) la terre do père mot, demende rachat à l'einzné, por la reson de la terre au meinné, qu'il tient, qui est morz, qui onc ne tint de seignor ; et li einznez ne viot racheter par la reson de la partie qui fut entr'aus. Si demende l'en qu'en dit droiz. Et l'en dit qu'il doit racheter : car des choses doteuses, l'en doit aler à la plus aperte, et nus n'est en veraie sésine, se le verai seignor ne l'i met.

§ 32.

Dui frère sont trové occis devant la meson à un borgois. Li borgois en fut empeechiez, et conut pardevant la jostice, qu'il les avoit ocis, comme cez qui estoient venuz en sa meson de nuizentre, et peceèrent sa meson, et le vodrent occerre. Et bien estoient aparessent as plèes que il avoit, et à sa meson qui estoit pecaée. Et qui vodroit dire encontre que ce ne fût vers, il est apareilliez do motrer et de l'avérer. Li prodom remet en pez. Li hériter vindrent avant, et demendèrent l'éritage au mort. La jostice le volt avoir. L'en demende qu'en dit droiz. Et l'en respont que li prochein devent avoir la chose, comme l'en ne pot pas bien savoir la manière de la mort, ne li morz ne se puet deffendre.

§ 33.

Uns hom si a sa terre qui mot de fié, et muert sanz enfanz de sa feme esposée. Sa terre doit eschéer au plus près, ausint comme de vilenage, fors en ce, s'il i a eu (en) eschéete de costé masle et femele iuves, li masles prent et la femele non. Et se la femele est plus près que li masles, ele prant avant que li masles.

§ 34.

Enprès nos dison que ennéence ne porte force en eschéeste qui vient de costé.

§ 35.

Ci enprès nos disons que de eschéeste qui vient de père au fiz, ou de mère, si ne sont que dui, li einznez a l'ennée, et emportera les deus parz ; et s'il sont plus de deus, li einznez aura la moistié. Et en quanquez manière que li einznez emporte l'ennéece, il a tozjorz le meillor herbargage à son chois, et un arpant de porpris.

Et s'il i a enfanz de deus femes, ou de trois, en ce qui sera commun [p. 236] prendra-il l'ennéance ? Ou (oïl), li einznez de sa première feme, ou quart don do segont mariage, et en huit do tierz, et issint en consinence. Et si li einznez mort einz que il ait partie, li einznez après l'ennéance, et issi en consinence.

Or demende l'en se il n'i a masles, se filles non, il n'i a point d'ennéence ; ainz doivent partir iuéement. De baronie vet autrement, et de contez : car baronie et contez est départie iuéement à filles, et si sanz desmembrement la baronie. Et s'il i a fiz, il a tot, et fet avenant mariage as autres. Et s'il i a plusheirs contez et plusors baronies, li meinnez et les filles auront chescun la soe, se costume no tot.

§ 36.

Quanquez père et mère fet est estable. Se uns des trois frères mort, qui ont lor terre commune, et ont un frère qui a parti à aus, il prendra en l'eschéeste.

§ 37.

Tot ce que home ou feme labore ou fet laborer do sien, sont contez por mobles, toz seest (tout soit) le fruiz pendant. Vignes fetes à seson de grant façon son conté por moble. Mès se l'en fet gaagner à métié, li morz n'enporte que ce qu'il i a mis.

§ 38.

Se aucuns a eu l'ennéence de la terre son père, et la mère remet seisie de son héritage enprès la mort son seignor, et li einznez fiz mort, li einznez fiz, qui vindra après, aura l'ennéance de la terre à la mère.

§ 39.

Quant li pères et la mère marient lor enfanz, tot i eit-il ainzné a ce, forz de la chose do (dont) père et mère mort seisiz, ou est seisiz.

§ 40.

Se feme a enfanz de deus seignors, femeles do premer et masles do segont, les femeles enporteront l'éritage à la mère ; car totes les choses que la mère ot ou premier mariage sont au pres (premers) enfanz ; des choses au père, non, s'il a eu segonde feme, et enfanz de lui ; que la segonde feme a le quart por doere ; et c'est patremoine as enfanz de celui mariage ; et l'autre quarz communs à toz.

§ 41.

Fiez ne pot esmortir sanz l'autroi de deus seignors, et plus le ne set.

§ 42.

Uns gentis hom n'a ne père ne mère ; li baus de lui vient à un chevalier, qui a rachaté. En ce uns siens vavasors muert, qui tient de lui, et est sis coisins, et li eschiet la terre. L'en demende se cil qui a le baill rachètera ? Et l'en dit que oïl, (ou il) lerra le bail.

§ 43.

[p. 237] Uns chevalier se muert qui a terre de fié, et a enfanz, et doivent tant, et est la terre si chargie de detes, que l'en ne puet trover qui vuelle prandre le bau. Si demende l'en comment li sires aura son rachat, et li détor lor detes ? Et l'en respont que li sires aura et lèvera premièrement s'année ; et enprès la chose sera mise, por le conseil dou juige, ou profit des enfanz, et à quitier lor detes, sauve lor vivres.

§ 44.

Une feme si a deus seignors, et ot terre que li pères li dona au premier mari, et en ot enfanz, et ot enfanz do segont mari. Au vivent au segont mari, terre li eschoit de son frère, et avenue de son père : l'en demende quele partie li premier enfant et li segont prendront as choses de par la mère ? Et l'en dit que li premier prendront le premier mariage, et li segont auront les eschéetes ; et les venues seront au premiers et au derreniers, sauf l'ennence. C'est à la costume de Orliens. A la costume de l'Ostel le roi, de eschéeste et d'avenue sont tuit li enfant iue, sauf l'ennéence ; et raportent li premier enfant lor première partie en commun, s'il volent prendre.

§ 45.

Nos dison que li enfant do premier mariage ne sont pas heirs des detes ; mès li enfant do segont mariage, et do tierz, chascun de son mariage paeront les detes ; et ont les mobles et les conquez. Et s'il n'i a ne mobles ne conquez, chescun paera segont que il aura de l'éritage, li premier, et li segont, et li tierz.