XIII. De los.
§ 1.
Los si est une chose que l'en doit à seignor quant aucun vant sa terre. Et est apelez los de loer ; quar la vente n'est pas parfete devant que li sires l'ait loée. Et li los si monte le quint denier ; et cil le doit rendre qui vent, se convenenz n'est ; et li sires de qui fié ce est, si le doit avoir.
§ 2.
L'en ne rent pas los de choses aumônée, ne de change but à but à héritage. Et se l'en change partie à héritage, et partie à deners, a-il los ? Oïl, de tant comme il aura deners. Et se l'en change l'éritage à marchendise, ou en vin, ou en robes, i aura-il los ? Oïl ; car ce torne plus à deniers que à héritage ; car chose movable si est contenus por moble, et héritage non.
§ 3.
L'en ne rent pas los de engagement, ne de loage, ne de escheeste, ne d'avenue, ne de partie commune, s'il n'i a termes (tornes ?), mès s'il i a termes (tornes ?), de tant doit l'en le los.
§ 4.
L'en ne rent pas los de don, ne de testament, ne de pez.
