§ 1.

Renaut de Tricot dit : Quant aucuns muert sans fere testament, li enfant que il a de léal mariage sont premièrement apelé à son héritage. L'en entant cez qui sont nez après ce que mariages est parfez, non pas çaus qui sont nez en avotire ou en fornicacion, et enprès (avant) mariages est fez dou père et de la mère ; icil sont mis dou tout hors dou héritage. E puis cil qui poet estre hers par les lois, et puis li plus procheins paranz.

Se aucuns ne fet point de testament, la possessions des biens est donée à cez.

L'en conte profitable tens en doner la possession des biens. Se cez à qui ele apartient, le sorent toz les jorz, et il porent demender ; et li jorz en coi il ne les lesseroit (ne le sorent) pas, ou il ne la porent pas demender, ne lor doivent pas estre contez. Si comme se aucuns sorent que cil de qui il doivent avoir la possession des biens, estoit morz sanz fere testament, et puis li vint uns mesages qui disoit que il n'estoit pas morz, ou que il avoit fet testament, et insint commeince-il à doter se la possessions des biens li apartenoit ou non : li termes en quoi il dota ne li sera pas contez2.

§ 2.

Et autresint se il ne pot pas pleinement demender la possession des biens, ainz le convient aler as plez, puis que il sot que cil fut morz sanz fere testament : li jorz en quoi il en pleida ne li doivent pas estre contez3

Li tens en quoi li prévoz ne pot pas tenir les plez, por ce que il estoit enbesoignez de commune besoignes, ou de privées, ne li doit pas estre contez4

[p. 246] Et se li prévoz estoit en une autre cité, cil à qui la possession des biens apartient ne doit pas atendre que il veigne là où il est, enz doit aler à lui, se il est dedanz vingt liues près de li5.

Se li enfes qui est encore au ventre sa mère doit estre mis en la possession des biens, et li doit l'en doner de terme non pas tant solement trente jors, mès tant que li enfes soit nez ; car se il nest as trente jors, il doit avoir la possession des biens maintenant6.

Geufroi de la Chapele dit que l'en ne doit pas atendre le san que cil ont qui ne dotent rien, mès celui que aucuns puet avoir, ou par lui ou par autres, por demender consoil à plus sage que il n'est7.

§ 3.

Johen li Monoiers dit : Se li pères set que la possessions des biens soit achaete à son fiz, et li fiz ne le fet (set) pas, li sens au père ne nuist pas au fiz8.

§ 4.

Johan de Beaumont dit : Se tu estoes sosmis à celui qui fut fet heirs o toi, ou tu receus la possessions des biens, et ton compoignon ne la volt demender : l'en entent qu'ele t'est tote donée, et il n'aura pas poer de demender la9.

Li fiz a un an de terme à demender la possession des biens, non pas tant solement quant il la demende comme fiz, mès quant il la demende comme paranz. Et autresint quant li pères a franchi son fiz, jà soit ce que il demende la possessions des biens comme patrons, neporquant il a un an de terme au demender la10.