III. De testamenz.

§ 1.

L'en dit ci que home qui n'est d'aage de quinze anz, et feme à douze anz, ne puet fere testament, tot soit-il sanz père et sanz mère. Et s'il a quinze anz et plus, il puet fere testament. Home et feme qui n'est an son droit, ne puet fere testament1.

Home ou feme puet doner en testament le quint de son heritage, et toz ses mobles, et toz ses conquez, et plus non, ait enfanz ou n'ait enfanz. D'achest l'en puet testamenter. Lo quint de totes choses puent estre aumônées, fors baronies, qui ne puent estre desmembrées ; et sor cez baronies puet l'en lessier pécune à rendre, la value dou quint ou testament.

§ 2.

Enprès l'en dit que nus ne doit fere testament de la chose, s'il n'en est droiz herz. Home qui muert sodiuement, et n'a poer de deviser [p. 225] sa chose, ne remaint pas por ce qu'il n'ait son testament, c'est à savoir sa droiture.

§ 3.

Qui ne fet testament, et fere le puet, est semblant qu'il voille miauz que si heirs ait sa chose que li testamenz ; et l'en doit mout la volenté au mort acomplir.

Feme qui a seignor, et home qui a feme, et hont enfanz, ne puent doner que le quint de lor héritage, et le tierz de lor mobles ; et le tierz est as enfanz, des mobles, et des conquez ausint.

§ 4.

Johan, contes de Blois, dit que li testamenz la contesse de Chartres, sa cosine, n'ere pas à droit fez, qui avoit doné à la fille son mari, le contes de Sessons, lou quint de son héritage, et toz ses mobles, et toz ses conquez. Et de ce oïrent droit en l'ostel le roi Loïs, à Meleun, à la septembreche, en l'an mil et deux cent et cinquante-cinq : et fut dit par droit, que li testamenz ere fez à droit.

§ 5.

Testamenz n'est pas pris sor doere, mès tot sor la partie á l'oir.