XXVI. De demende d'éritage, et d'avenue.
§ 1.
Je me plaign de Guillerme qui est entrez en une meson assisse en l'ostelerie, en la censive le roi, et s'en est mis en sésine contre ma volenté ; dun Pierres de Chilli, mon père, mori sésiz et vestuz, et tenanz de seignor : si deviens la sésine avoir, comme cil qui est sis heirs, et bien si apèle, et de la partie don la chose muet ; et bien me alignagerai, se mestiers est, se m'a nié ; et se il m'a queneu, je demans la sésine, ou droit, se ge la doi avoir ou non ; et ce sui prez de prover, si com je devrai, par moi et par garanz.
§ 2.
Qui velt demender propriété, la puet demender en tel manière ; mès que il die en son commoincement que ele fut son père, et que il en morut en seignorie, et tenent de seignor, et d'ofice de baron et de vavasor.
§ 3.
En ces meismes manières puet l'en demender les choses de son eal ou de s'aole, ou de son fil, ou de sa fille, ou de son frère, ou de sa sor, ou de son prochein parant. Et doit l'en fere retenue, que se l'en dit poi, l'en dira plus en leu et en tans, tant que tort ne l'en prendra. Et melz vaut tozjorz à demender possession que propriété ; car l'en a plus tost prové la possession que la propriété. Et qui est en sésine, a l'avantage à deffendre la propriété.
§ 4.
Se le vavasor mon vavasor, ou le baron mon baron, m'a fet tort, qui sui chies sires : mon baron, ou mon vavasor le doit avoir, à ma requeste, pardevant moi, à moi respondre dou tort que il m'aura fet ; et le jurra par droit, par la costume de la chastelerie.
