§ 1.

Servir si est servir son seignor por la terre que l'en tient de lui, en queconz manière terre mue seignor, ou de la partie à celi qui tient le demoine, ou de la partie à celui qui est sires. Servise est deuz quant l'en le vient lever, c'est à savoir un rocin de servise de soixante sols. Et se aucun tient partie de fié, et soit en homenage, il n'en rendra que partie des soixante sols, c'est à savoir, de la moistié la moistié, et do quart le quart. Et tant comme les dui persones vivent, cil (qui) a pris le servise, et cil qui a servi, et la chose soit en lor main, servise n'en sera levez.

§ 2.

Feme, s'ele est. veve, ne sert pas, se sis mariz a servi.

§ 3.

Après un autre servise est, que doivent senez, c'est à savoir servise d'ot ; et chascun le doit si comme costume est. Et cest servise doivent totes genz, ne nus ne s'en pot deffendre. Et est deuz en plusors manières ; li uns les doit sels, li uns les doit soi et autre ; li autres les doit soi quinz ; li autres les doit soi dizèmes. Et ce servise est deuz segont la costume de la région, et est acostumé par nombre d'anz, et nus n'en est frans por la reson do commun profit.

§ 4.

Nus fiez liges ne doit servise.

§ 5.

Nus ne sert feme quant sis mariz est morz, quant l'en a servi son seignor. Ne feme ne sert pas se ele est veve, se sis mariz a servi, se li sires de qui ele tient (ne) muert, et viegne noviaus.

§ 6.

Feme n'est d'aage por servise devant que ait quinze anz, et home devant qu'il ait vingt anz et plus.

§ 7.

[p. 239] Se hom doit servise à son seignor, et il est rendu, et li sires li demende, li hom s'en passera par son seremant. L'en siert celui qui a le bau et loier, quant il vient à terre tenir.

§ 8.

Se aucuns seignors demende à son home, que il ait doné terme à son home de son servise plus que la nuiz, par quoi la chose soit chesle en dete ; se li hons conoist la fin, et le servise, et le terme, et il dit qu'il l'a paie, par soi et par garanz ; et s'il nie le terme ; et il dit que il ait rendu au seignor : il n'i a que son serement.

§ 9.

Uns hom doit un rocin de servise por terre que il tient, que il a de fei. L'en li demende le rocin. Si demende l'en comment il seret renduz, et quant ? Et l'en dit que il a trois pares de nuiz del paier : la première nuiz, il doit venir et amener le roncin ; se il est refusez, il doit ausi fere la première, la segonde nuit, et la tierce ; et se il ne le parfet à la tierce resonablement, il chiet en l'amende de soixante sols, et rant le roncin.

Tes est li roncins de servise : garni de sele, et de frain, et de chavaistre, et d'esperons, et que tot valle soixante sols.