École des chartes » ELEC » LI DOUZIESME LIVRES » XV. De reliés.
[p. 242]

XV. De reliés.

§ 1.

En plusors los a diverses costumes sor vilenages. En aucuns los a reliés, et li reliés est segont ce que l'en a usé. En Orliens est tele la costume, que la meson, quant ele doit relever, se l'en n'en fet la volenté au seignor, done de relief ce que ele vaut de loer un an, ou ele remaindra gaste de clôture, de uis et de fenestres ; et c'est o chois à celi cui la meson est.

§ 2.

Quant home prent feme, l'en doit relever de lui, se l'en n'a relevé de la feme. Mès se l'en a relevé de la feme avant qu'ele prist seignor, l'en ne relèvera pas por ce, se ele a pris seignor.

§ 3.

Quant père et mère muert, li enfant relièvent de la mort de leur père et de leur mère communément ; et s'il partissent, il ne relièvent pas quant il vienent en aage.

§ 4.

L'en reliève del mari à la feme, tost soit-il parrastres, tot muevent les choses de son premier mari. Mès l'en relèvera el non de enfanz ; et fera segur qu'il la (les) fera tere, quant il seront aagé. Mès l'en ne relève pas del segont mari del cens qui est patremoine à la feme.

§ 5.

Li sires relèvera la terre qui mot de par la feme qui prent do seignor. Tant de foiz comme le seignor de la propriété mue, ou celui qui a la seignorie, ou celi qui a la propriété, tante foiz relève l'en. Se li sires à la feme muert, la feme ne doit avoir relevaisons ; mès feme doit relever quant la chose li vient novelement, c'est à savoir la propriété.

§ 6.

En totes les manières que la censive mue seignor, de queque partie ce soit, soit de par le seignor qui tient le fié, soit de par celui qui tient le vilanage, a relief.

§ 7.

[p. 243] Tant comme li enfant seront non aagé, et seront ou bau don père ou de la mère, l'en ne relèvera do père ne de la mère ; car père ne mère ne rachaste pas le bau de ses enfanz.

§ 8.

Quant il a eu cens de vignes ou terre, meins de six deniers l'arpent de cens, ou plus de huit, il ne doit que tel cens, teles relevoisons, segont la costume de Orliens. De mesons vet autrement. Quant sires s'est tenuz an et jor, et reçoit son cens à gré, et tient son censier en sésine, et enprès demende relevoisons ou amendes, il n'en doit mie avoir response.

§ 9.

Servise puet estre tozjorz demendez.

§ 10.

Nus ne se doit fere sire de ce don il doit estre sogiez.

§ 11.

L'arpent de vigne doit trois sols de reliés, et li arpenz de terre trois sols. Bau de vilanage ne doit pas reliés.

§ 12.

Tant comme home tendra ses enfanz enprès la mort lor mère, la terre à la mère ne doit point de relief ; enprès la mort au seignor, se la feme doit relever, feme reliève son héritage ; enprès la mort son seignor, et se aucuns a relevé avant qu'ele prist son seignor, a (elle) ne doit pas relever.

§ 13.

L'en doit relever les héritages au mort, ce à qui il aviennent, ou à qui il eschéent.

§ 14.

Home reliève de la prise sa feme la terre qui mot de par sa feme.

§ 15.

Nus ne reliève de celui qui a la chose en bau ; mès l'en reliève des enfanz, tout soient-il non aagé ; et sont mis li dener en sauvegarde  ; et cil qui a la garde des enfanz, se il la (les) velt avoir, donra segurté que, quant li enfant seront aagé, qui se teront et auront estable ce qui est fet, ou qu'il rendra les deners arières à cez de qui il les a euz.