XVI. De la possession des biens do mariage et de la feme1.

§ 1.

Adam dit : A ce que li mariz et la feme ait la possession des biens li un à l'autre, il convient que il i aist juste cause : si comme se li mariz a vendu la terre sa feme, il pot fere contrepois de la soe, pardevant le juige ; ou s'il velt vendre la soe terre, porra par besoing  ; et il est plus profiz au mariage de vendre sa terre que la sa feme.

[p. 244] Lors doit-il venir au juige, et requerre que il mete avenant remède, por le besoing do mariage, en avoir contrepois de l'éritage sa feme. Et li juiges doit regarder les persones, et la quantité des enfanz, et le besoing : et lors, par le consoil de bones genz, doit li baillis otroier que li uns face retor à l'autre, et ait ferme et estable. Et si est ferm et estable ce que sera fet par tel manière, quant aucuns a doné de son héritage à ses enfanz à aus marier, et li autres n'en ait riens doné. Et ce doit estre fet avent, et par le juige, et en autres manières est nules.

§ 2.

Li uns ne pot avoir la possession à l'autre, tant comme li mariages dure.