XII. De paages.

§ 1.

Uns bons si doit paage en une vile : li prévoz l'areste, et dit qu'il n'a pas paié son paage. Cil respont qu'il l'a rendu là où il doit, et [p. 241] quant il dut, et l'offre à jurer ; et li prévoz dit que por tant ne veaut-il mie que il s'en past. Segont cez paroles s'otroient à juiger. L'en demende qu'en dit droiz ? Et l'en respont que por tant ne s'en doit-il pas passer ; car dire : J'é rendu quant je dui, et là où ge dui, por ce n'en sui-ge pas quites. L'en demende comment il s'en doit passer ? Et l'en respont : se il nomme le leu, et à qui il l'a rendu, tot ne sache-il pas le nom ; et la persone me die aissi : à un home qui estoit léanz ; et s'il dit eissi, il s'en passera par son serement. Et tel loi si est de costume qui ne done que cinq sols et mains.

Et se la costume est granz qu'ele doie quinze sols ou cent sols ou dix livres la costume, comment s'en passera-il qu'il ait rendu tel costume ? L'en dit que il convient que il le preuve par soi e par deus garanz, qui jurront que il l'ont rendu en la meson où l'en le reçoist ; et en quel leu, à un home qui se fesoit receveor ; et ce jurront, et por tant s'en passeront, et seront quite de la costume.

Et se aucuns rent allors costume que en la meson où l'en la reçoit, l'en n'en est pas quites, tot se face aucuns receverres.