322
Accord. — Adam de Trétainville, abbé de Saint-Euverte, s’oppose en procès à Jean Martin l’aîné, épicier et bourgeois d’Orléans, en raison de diverses maisons et de leurs habitants que l’abbé déclare être dans la censive de l’abbaye dans la paroisse Saint-Jean-de-Braye, ce que l’épicier conteste, se prétendant le seigneur de la censive dont il a toujours jouit. Finalement les parties s’accordent et l’abbé reconnaît les droits de l’épicier sur ces hôtels.
136 r°Comme discort, debat, plait et procés feust meu et esperé de mouvoir par devant nous et ailleurs entre reverend pere en Dieu monseigneur Adam de Tretainville, humble abbé de l’eglise et abbaye monseigneur saint Euvertre d’Orleans, demandeur d’une part, et Jehan Martin l’ainsné, espicier et bourgois d’Orleans, deffendeur d’autre part, pour raison de certains hostelz et subgetz, lesquielx ledit monseigneur l’abbé disoit estre de sa censive qu’il a et lui appartient, a cause de ladicte eglise Saint Euvertre, estant en la parroisse Saint Jehan de Brayes lez Orleans. Lesquielx hostelz ledit monseigneur l’abbé disoit avoir faiz empeschez comme a lui appartenans a cause desdictes censives, et par ledit Jehan Martin fut deffendu et dit que, imposé qu’il eust fait ou fait faire arrest sur lesdiz hostelz n’avoit aucun droit, mais lui appartenoient lesdiz hostelz a cause et pour raison d’une censive qu’il a et lui appartient, assise et seant au lieu du Petit Bois estant en la parroisse Saint Jehan de Braies, et que tous jours en avoit joÿ et usé au veü et sceü dudit monseigneur l’abbé et de tous autres. Finablement, lesdictes parties pour bien de paix et eschever tous debaz et procés, recongnurent et confesserent, en la presence de Pierre Christofle notaire de Chastellet d’Orleans, que de et sur les choses dessusdictes elles avoient et ont accordé ensemble en la maniere qui ensuit. C’est assavoir que ledit monseigneur l’abbé, eu regard et consideration ad ce que ledit Jehan Martin a affirmé par serment lesdiz hostelz, par lui empeschez, estre de sadicte censive dudit Petit Bois et a lui appartenans et, partant, ledit empeschement quy mis y avoit esté par icellui monseigneur l’abbé a esté levé a plain, du consentement et voulenté de monseigneur l’abbé, et aussi s’en est deporté quant a present au prouffit dudit Jehan Martin. Promettent non venir contre etc. Fait le mercredi XVIme jour d’octobre CCCC XXXVII.
Dans la marge gauche : f.
