§ 1.

Honorius III. Tua2. Un vilain voloit un son fiz marier qui n'estoit pas d'aage, sanz ce que cil le vossit : l'en demende s'il le pot fere ? La pape dit que non ; mès il le pot esposser, et cil fiz doit achever le mariage.

§ 2.

[p. 186] Felix papa. Ubi.3. L'en deffant ci que l'en ne face exposalles avant sept anz, se n'est por pez.

Note que l'en ne doit pas fere jointure d'aucun, se il n'est de droit aage ; et âge de esposalles est de sept anz ; et mariage de pucele est de douze anz, et en vallet de quatorze.

§ 3.

Isidorus. Puberes.4. L'en dit ci que, tot cuident aucun que jenure ce soit danz, l'en pot dire celi d'aage qui pot f...., et l'en pot apeler celes femes qui poent porter enfanz.

§ 4.

Alex. III, Herefordenen. Episcopo. Litteras5. Uns se maria à un autre par esposalles, et enprès f.... sa mère, et la prist à feme. L'en demende se ce mariage tient ? Et l'en dit que, s'il esposa sa fille emprès sept anz, il n'aura ne l'une ne l'autre, et si d’avant sept anz, il porra remaner à la mère.

Note que l'en ne pot fere esposalles o qui n'est de sept anz ; et à ce que avient sovant amoine l'en les droiz.

§ 5.

Idem. Ebroacens. Episcopo. Accessit6. Un esposa la fille qui n'estoit pas aagé ; emprès il furent départi ; li hom prist la mère à la fille. La pape dit que, se la fille ne estoit bone à marier quant ele fut esposée, ne ne s'acorda pas puis que ele fut bone à marier, le mariage ne tient pas ; et se ele avoit acompli sept anz, cum ele se soit consentie en lui, li bon ne doit pas remanoir à la mère.

Note que département est là où il n'a nul mariage.

§ 6.

Idem. Norvicen. Continebatur7. Un esposa un autre ; cele qui se voloit départir, disoit que ele li avoit esté esposée dedanz sept anz, ne ne s'i estoit pas consentue ; li hom disoit que il l'avoit f.... ; la feme le niet. L'en dit que l'en en doit croire l'ome o son seremant. Enprès dit que se aucuns esposse aucune, il ne pot marier soi o autre do lignage à cele.

Note : Se le home dit que il eit f.... aucune, et ele li nie, le en doit croire l'ome, se il jure, se la feme ne mostre son c..., et prove qu'ele [p. 187] soit pucele. Et en ce cas doit l'en croire le seremant d'un ; et des onze anz en avant, et feme a mari ; et hom ne se pot marier o la cosine sa feme.

§ 7.

Idem. Baton. Episcop. De illis8. L'en dit ci que se aucun se entr'ament entr'éposent, qui ne sont d'aage, et avant que il séent d'aage se volent descorder, l'en ne les doit pas oïr, ainz devent entendre dusque à droit aage ; et se lors l'un ne se volt acorder, il devent estre par juigement d'yglise départiz. Enprès dit l'en que, se femme d'aage se marie ou un autre qui n'est pas d'aage, et avant que il séent d'aage se voloient dessentir, il ne pot dusque il soit en aage.

Note que se genz de sept anz ou de plus s'entr'éposent, ne l'un ne l'autre ne poent aler encontre ; et se li un est plus tost d'aage que l'autre, cil qui se descorde ne doit pas estre oïz dusque il soit aagé ; mès s'il viennent endui à âge, il se poent bien descorder, s'il volent, et ce par juigement d'yglise.

§ 8.

Idem. Nobis9. Aucun dedanz aage se marient : l'en demende si se poent départir avant aage ? L'en dit que non, ainz devent atendre aage ; et lors, si se volent départir, si se départent, se l'un n'a f.... l'autre.

Note que nus ne pot consentir en mariage dusque il soit d'aage ; et f..... fete en non aage fet enprès le mariage.

§ 9.

Idem. Jan. Episcop. De illis10. Se aucun se consent en aucune dedans aage, ce n'est pas mariage ; lors, s'il pot f......, c'est mariage, ne ne pot descorder s'il n'i a porquoi.

Note que force excusse toztens.

§ 10.

Urb. Ceno. Episcopo. Atestaciones11. Un de douze anz se maria o une, et se poigna s'il la puet f......, et ne pot ; enprès, avent aage, il se parti de lui ; ele le demendoit. L'en dit ci que, se la feme ne provet que il se consentist en lui en aage, qu'il soit essoés de la demende à la feme, en tel manière qu'il le jurt.

Note que efforz qui n'est pas profitable ne fet mie tort ; et emprès ce [p. 188] que li garanz sont overz, pot l’en tesmoinz recevoir ; et tot ne prove le demendeor, cil à qui l'en demende doit jurer, tot soit-il délivré quant li autre ne prove.

§ 11.

Idem. Pysa. Ar. EX litteris12. Un de douze anz se maria o une qui n'estoit pas aagé ; enprès li parent la li baillent contre sa volenté, et fut o lui un an ; et au plus tost qu'il pot, cil retorna à la meson son père, ne ne vels retorner, ne estre à celi, ainz velt estre o une autre. La pape dit que ele doit atendre cel enfant dusque il soit d'aage ; et s'ele ne velt, qu'ele se marit.

Note que hintement d'un an ne sofist pas à consentement de mariage, c'est voir là où aucune se consent.

§ 12.

Celsus III. Duo pueri13. Un vallet de six anz et une pucele de sept de futur se marièrent, et furent ensemble trois anz ; enprès le père à la pucele la li osta et la bailla à un autre ; et quant li enfes vint à âge, quant il ot congié de soi marier, il se maria à la cosine à l'esposée. Et por ce que cil à cui li pères avoit la fille ballie l'avoit lessée, l'en força l'enfant de reprandre la, et de l'autre lessier. L'en demende qu'en dit droiz ? Et l'en dit que por la faute de l'aage ne fut nul mariage entre aus, mès solement esposalles ; et tot eust eu li enfes congié de soi marier o autre, ne se dut-il pas marier o la cosine s'esposée : la première n'auroit-il pas, car ele ot léau mari, ne il la secone (seconde). Se l'un n'a f.... l'autre, il se porront aillors marier ; et que le père à la meschine eit sa pénitence de ce qu'il la départi sanz le juigement de sainte yglise.

Note que mariage ne pot estre fet de sept anz.

§ 13.

Inno. III. Ad desolvendum14. Dui frères disent que ce qui avoit esté fet d'un mariage d'un bacheler et d'une meschine ne valoit riens, car ele n'avoit pas sept anz ; et tot fut-ele en aage, ne le pot-ele avoir, car ele estoit sa coisine. Quant la pape ot ce oï, il cassa ce fet, et dist que l'en n'en poet acuser ce qui n'estoit mie ; mès l'en poet bien dénuncier que le mariage ne fût fet. La pape mist terme au dénuncement, et deffent que entretant ne facent riens, dusque le dénuncement soit prové ; et s'il font encontre, que tot soet néant.

[p. 189] Note que dénuncement est fet aucune foiz de crime qui n'est pas encor fet, ainz est à fere.

§ 14.

Idem. Albanen. Episcopo. Tue15. Un esposa la fille à un, qui n'avoit pas douze anz ; quant le père à cele pucele fut mort, sis uncles la dona à un autre : l'en demende s'il pot à l'autre remanoir ? Et le pape dit que, se la pucele, quant ele fut esposée, estoit bone à marier, ou que ele ne l'estoit pas, esposailles furent entre aus solement ; et le segont mariage, se aucune chose vaist encontre, est tenable.

Note que malice fet aage, tot die l'en que sen le fet. Note bou enseignement : quant l'en dote d'aucuns de lor mariages, l'en doit regarder lor aage, et lors pot l'en juiger segont ce.