§ 1.

Alex. III. nomina. cen. e. Relatum2. Un hom por peor d'omicide qu'il avoit fet en une cité, s'enfoï. Enprès vindrent uns qui acusoent le mariage, et disoient que le père à la feme estoit père au mari, et por ce ne la poet avoir. L'en dit ci que se cil mari furent ensenble aucune foiz, se li acuseor sont léal, l'en face quérir le bacheler ; et se l'en ne pot trover, li afferes soit terminez.

§ 2.

Celsus III. A nobis3. L'en demende ci se l'en pot doner sentence en cause de mariage, se li garant ne dient rien de parole, mès s'il estaient (escrivent) lor tesmoing par cherité ? L'en dit que non.

Note que nus ne pot estre acusez par letres.

§ 3.

Celsus, papa. Videtur4. L'en dit ci que, en joindre mariage, les tesmoinz as parenz devent estre plus tost receu que autres : car il en sevent plus la vérité.

§ 4.

Idem. Insuper5. Un se maria o une pucele qui n'estoit pas bone à marier ; et quant ele fut d'aage, enprès quatre anz ou cinq, ele dist, contre le mariage, que ele se maria contre sa volenté. Et l'en dit ci que por ce qu'el sofri que cil la f.... une foiz, ele se fist tort.

Note que f..... nuist à celui qui pot réclamer et contredire, et ne le fet ; et par fermeté est confermé ce que ne valut pas au commencement.

§ 5.

Inno. III, arc preposito et priori Sancte M. Significante6. Un se maria ; enprès la mère acusa le mariage sa fille, por avoir en aucun [p. 214] denier : et l'en demendoit, tot ne valut rien son acusement, que la pape en dit ? Le pape mende, que s'il est issi, qu'el ne soit pas oïe : car ele ne bée que à nuire.

§ 6.

Cum in tua7. Aucun volt un mariage acuser, qui au tens qu'il fut banni en iglise n'i mist point de contredit. L'en dit ci qu'il le pot bien fere, s'il n'i fut pas quant il fut benni, ou s'il fut malade, ou s'il fut en enfance, ou empêchié d'autre cause ; ne n'est pas oïz à acuser, s'il ne jure que l'en li a dit ce qu'il met sus, et que par malice ne le fet ; ne il n'est pas por ce osté d'acuser, s'il l'a apris d'autre.

Note que maladie est provable en cause d'ignorance ; et aucun pot acuser ce qu'il oï en s'enfance ; et allégament d'ignorance n'a mester en ce que l'en fet apertement ; et aucun est receu à fere aucune chose où son auctor ne seroit pas receu.