§ 1.

Alex. III Cassin. abbati. EX litteris2. Un home enherra une veve, et la f..... Et quant il la volt prandre, dui vindrent et distrent que le premer mari à cele feme estoit cosin à cel home ou quatre genoil, et issi ne la poet avoir, et ce jura l'un et l'autre. Por ce l'ome la lessa. Enprès ce il l'esposa et furent ensemble. Enprès viendront dui autres, et jurèrent que le premier mari à la feme estoient cosin en quatre genoul à l'ome. Le pape mande à un abié, et li enseigne [p. 204] comment il doit les guaranz examiner, et li dit que à sages homes doit l'en bailler causes de mariage.

Note que abé pot conoistre de cause de mariage ; et aussi se doit home atenir des coisines sa feme si comme des soes ; et doit l'en savoir et conter les degrez ; et doit l'en bailler à sages cause de mariage.

§ 2.

Urb. III Vind. ar. Super eo3. Un esposa une pucele, et quant ele fut d'aage, ele requeroist que la prist : et il disoit que puis que il l'esposa, qu'il avoit sa cosine f..... L'en dit ci, que se ce est apert, et li vesin le dient, que la feme n'en soit pas oïe.

Note que plus vaut renomée que li tesmoing d'un.

§ 3.

Celsus III. Quod dilectio4. Poson que un soit loign do commun père ou cinq ou sept genou, et li autre ou trois ou en deux : l'en demende s'il se poent marier ? Et l'en dit que oïl. Li un et li autre devent estre en sept genou ; si que non, il devent estre départi.

Note que en dépècement de mariage por parenté, l'en doit conter le genouz de çà et de là. Légat pot fere indulgence.

§ 4.

Inno. III, ar. et ca. Turon. De infidelïbus5. L'en demende ci se hom et feme sont mescréant, s'il se convertissent à la foi, et séent joint en degré de parenté qui est deffendu, s'il devent estre départi ? Et l'en dit que non ; car verai mariage est entr'aus.

Note que mariage est entre totes genz.

§ 5.

Idem Biasemen. ar. Quod super6. Li père et li fiz, li dui cosin les deux cosines prenent à femes les deux cousines ; li autre se marient dedanz lignage. Au premier respont la pape, que tot soent li cosin à l'ome afins, et non pas à la feme, por ce n'est pas parenté entr'aus, et se poent itex marier ; et qui se marie dedanz degré de parenté doit estre puni.

Note que nule affinité n'est entre les coisins à l'ome et à la feme ; et ci est folle l'opinion d'aucun qui diseent que les dui serors ne se poent marier ; et costume ne s'escuse pas en péchiez, ne ne vaut rien en mariage.

§ 6.

[p. 205] Idem. Quia7. Cum un chevalier se fust mariez ou une que li teignoit ou cinq genou, il empétra indulgence de remanoir o lui, et fist entendant que il avoit enfanz, cum il n'en eust eu que une fille qui estoit morte. Donc li évesque do leu demenda que l'en en fera ? Et l'en li dist que bien le pot lessier ensemble.

§ 7.

Idem. Tua nos8. L'en demende que garanz sofisent à mariage dépécier, hoù il acontent les degrez d'oncle et de nevou, c'est de fiz de frère ou de la seror, cum il ne sachent rien de frères, o de serors, ne de plus haut ? Et l'en dit que l'en requiert que l'en conte les degrez des pères ou des cosins par lor propres nons, ou par le vallent de dire les persones ; et por ce que l'en receist en mariage garentie, doit dire il n'est pas moult (moins) fort.

Note : qui velt conter les degrez, il doit commoincier de l'estepe ; et note que l'en doit les degrez deviser segont lor ordre.

§ 8.

Idem. Tercius con. ge. Non debet9. L'en dit deus choses en ce chapitre : l'en dit que la deffense de mariage (qui) est en trois et an deus degrez d'afinité, et des enfanz receuz de segont mariage joindre à coisins au premer seignor, est hui rapelée. Enprès dit l'en que la deffense de colpe (copule) de mariage ne passe pas le quart degré ; et se aucun se marie ou quart degré, il ne soit deffendu de la loigneté des paranz.

Note que l'en ne doit pas juiger ne reprendre se l'en diverse segont la diversité des tens ; et lignage et affinité s'estendent dusqu'à quart degré.

§ 9.

Gregorius IX, ex Brocardi. Vir qui10. L'en dit ci que se li hom est loing do chief de parenté ou quart genou, d'une part, et la feme ou cinq, d'autre, il se poent bien marier.