§ 1.

Cause de doaire est perdurable à la persone de la feme, et à ses heirs qui istront de celui mariage. Il apartient au juige que les femes aient lor doaire sauf, par maintes resons : por ce qu'ele est de povre porvéance de sa vie ; l'autre si est, por ce qu'ele est sevre au seignor, et por ce qu'ele a dolor d'enfantement plus que sire n'a.

Non de doere n'est pas raportez à mariage que ne puet estre fet ; car doere ne puet estre fet sanz mariage, et là où il n'i a point de mariage, il n'i a point de doere. L'en ne puet plus doner au doere que la costume done, mès l'en puet bien plus apeticier que la costume ne done. Se aucuns prent sa première feme, il la puet doer de la moitié de toz ses biens ; et la segonde ausint, sauf le premier doere ; et la tierce ausint, sauf le doere à la segonde ; et toz les autres en consiguance. Et dit que se feme est départie de son mari sanz sa colpe, ele doit avoir son doere. Enprès l'en dit que se mariages n'est célébrez par la bénoïçon, et il n'avient en charnel compoignie ensemble, et est enprès dépéciez, ci n'a point de doere. Quant lignages est provez, et li mariages est départiz, l'en doit rendre à la feme son doere, et la moitié des conquez.

§ 2.

Idem. Une feme a son doere dou don de son premier seignor, et prant le segont seignor. Li segonz sire baille le doere à gaagnier à trois anz à un laboreor, et li preste dix livres por le fere valoir. Dedanz les trois anz, la feme muert, et eschiet li doeres, et demende li sires ses dix livres, et li heir et li laborreres en vienent encontre, et veulent [p. 220] avoir le prest. Et l'en respont que il n'auront pas le prest, car nus n'est puniz sanz colpe. Car il fist ce par droit, par droit li tolit, il ne meffit de riens ; et cil à qui il fit marchié, poit bien savoir que ce li en poet avenir.

§ 3.

Doere en fié de la dame a le mestre herbergage en arpant se il i a plus de un arpant, la dame l'ara ; mès ele le fera avant de terre.

§ 4.

Totes les choses assemblées dou premer mariage sont as premiers enfanz, ne nus n'i a doere, ne segont mariage, ne trez, dedans la banliue.