§ 1.

Ex. con. Warmiacen. Mulieres2. L'en dit que se feme est départie de son mari sanz sa colpe, ele doit avoir son doere.

Note : se mariage est rapelé, et le doaire, et quantque est doné par mariage.

§ 2.

Urb. III, decano et ca. lexonen. Significavit3. Quant lignage est prové, et le mariage est départi, li hom ne velt rendre à la feme son doaire, ne rien qu'il éent conquis ensemble : le pape mende que l'en rende à la feme son doaire et la moité de ce qu'il ont conquis.

§ 3.

Celsus III. De prudentia4. Cause de mariage fut baillée à un juige qui a doné sentence, n'onques ne parla de doaire : l'en demende qu'en dit droit ? Et l'en dit que cil qui dona sentence de département dut conoistre do doaire ; donc l'en commende que le mari soit forciez par escommeniement rendre le doaire.

Note que quant cause de mariage est, cause de doere i est ballie ; et qui a le principan, si a l'apertenant ; et se le mariage est départi par droite cause, la feme doit avoir son doere.

§ 4.

Celsus. Plerumque5. Se par fornicacion ou par sa volenté se départ de son mari, et fame enprès ne soit pas recordée, et li hom more, l'en demende se ele pot son doere demender à coisins à l'ome ? Et l'en dit que non.

Note que se feme fait fornicacion, ne ne se racorde pas à son mari, ele pert son doere ; et d'iqui puet l'en prendre une rigle, que l'un gaagne en la folie à l'autre.

§ 5.

[p. 218] Inno. III. Et si necesse6. Uns rois prist la fille au roi de Castele à feme, et li dona chastiaus en doaire, par tel convent que, si trovoist vers lui nule acheson porquoi il la lessât, li chastiau li remendrent. Et cum il fust aperessent qu'il estoient cosin, ne la voloit lessier, qu'il ne perdist les châtiaus. Le pape dit, que cum il n'et pas mariage entr'aus, qu'il let au roi ses chastiaus.

Note que là où mariage ne pot estre ; ne doaire ; et la reigle dit : Ce qu'est doné sanz cause, pot l'en redemender.

§ 6.

Idem. Nuper7. Se l'en otroie à aucun tenir aucune chose à sa vie, s'il otroie icele chose ou partie à aucune en doaire, l'en demende, quant li hom sera mort, se la feme le pot retenir ? Et encore demende l'en se l'en done aucune chose à aucun, et à son heir que l'en a de sa prode feme, de l'aport d'icele chose qui est donée en doaire de son seignor, s'il mort sanz heir, se la feme le pot demender, ou s'il doit retorner à celi qui primes le dona au premier ? A ce respont l'en que cil ne pot doner outre sa vie ce qu'il n'avoit que à sa vie. Au segont dit l'en que la feme, enprès la mort au mari, ne pot ce retenir, se cil ne l'otroie qui fit avant le don.

Note que yglise doit deffendre cause de veve et de povres persones ; et la règle dit que nus ne pot plus doner à autre que il n'a ; et nos ne devon pas deffendre cause à tort.

§ 7.

Idem. arch. et ar. Janen. Per tuas8. L'en dit contre un home qui redemendoit le doere sa feme, que il avoit chacée de soi, et qu'il avoit la vérité teue quant il empétra les letres, que l'en avoit juigé que por ce que il apovrissoit, il ne li poeist fere doaire. Quant ce fut prové, li juige li commendèrent qu'il reprist sa feme, et que li doaire fust mis en autre main, dusque le plége fust donez. Le pape dit que bien pot l'en baller à l'ome un po de doaire, à qui l'en balle le cors à la feme ; donc il mande que l'en li aseigne doaire, en donant aucune plévine, ou qu'il soit ballié à aucun marcheant qui l'esplète, que cil en puisse [p. 219] sostenir le fès do mariage ; car poor seroit, se le doaire estoit retenu, que li un et li autre encore péril de fornicacion.

§ 8.

Gregorius nonus. Donatio9. Ceste décrétale est devisée en deus parties : primes dit l'en que, se don est fet entre home et feme en mariage, et li un en soit plus povre, le don ne vaut rien. Enprès dit l'en que quant le mariage est départi, les doaires retornent arières, se costume ne vet encontre, ou convenance.