§ 1.

Ex conc. Afri. Quicumque2. Se mariage est fet soz convenance mauvese, le mariage doit estre, et la convenance doit remanoir.

Note que mariage fet soz vil convenance tient, tot soit la convenance quassée.

§ 2.

Gregorius Ep. Spoliacen. Cum sit3. Un franchi deus sers en tel convenance qu'il seroient moines ; li un issi de l'aboïe : le pape mende à un évesque qu'il le force de retorner.

Note que franchise pot estre donée soz condicion.

§ 3.

Alex. III. De illis4. Note que ci a léal convenance : Se tu me dones cent sous, je te prendrai.

§ 4.

Idem. Verum.5Se aucun done aucun fié à yglise par tel convent qui est entre aus, il ne porra pas rapeler le don, se la condicion n'est seguë. Et ce que l'en done, se la condicion n'est tenue, puet estre rapelé.

[p. 192] Note que, en ban de chose donée, pot cil qui done metre tel convenance comme il velt.

§ 5.

Urb. III. Super eo6. Un se maria o une issi : Je te prens, se mis pères le velt. L'en dit que ce n'est rien, se li pères ne velt.

Note que ci a bone convenance : se mis pères le velt, je te prandroi ; et tel fet est mis en autrui volenté.

§ 6.

Inno. III. Ep. Marsiten. Per tuas7. Une feme demendoit un bachelier, et disoit que il l'avoit esposée et f.... ; li hom no niet pas, mès il disoit qu'il fût fet, s'il plésoit à son père et à son oncle ; et il ne le voloient pas ; et ce voloit prover. La feme disoit que tot i fût la convenance, com cil n'alassent pas encontre, et cil l'eust puis f....., ce qu'il disoit ne li devoit pas nuire ; et tot i eust convenance au commoincement, enprès ele fut lessée et ostée. Tesmoinz furent trez de çà et de là, et overz. Et com l'en dotast de ce, l'en enquist consoil le pape, qui dist que, comme il aparesse clèrement, par la confession à la feme et à l'ome, qu'il la f.... enprès les esposalles, le mariage est entre aus ; que tot fust-il prové que li père et li oncles i eussent mis contredit, il la f.... puis ; il ne fut pas prové, que puis qu'il la f...., qu'il le contredissent.

Note que en mariage fet pot l'en mestre honeste convenance ; et plet n'est pas déterminé par la confession de parties fetes en juigement ; et l'en lesse la première convenance, se autre contraire marchié vient enprès.

§ 7.

Greg. IX. Si condictiones8. L'en dit ci que se convenance qui est contre la sustance do mariage i est mise, il ne vaut rien ; aussi comme l'en dit : Je te prendrai dusqu'à trois anz, ou se tu fez chose por quoi tu soes beraigne, ou se tu embles ; la convenance est nule, et le mariage tient.