§ 1.

Tuit cil qui tiennent en fié sont en baill por la reson dou fié. Or demende l'en qui aura baill ? L'en dit que li plus prés. Et s'il i a feme ou home iue, qui aura léal ball ? Li uns ou les dui ? L'en dit : li mâles aura la garde. Et s'il sont trois mâles iues en l'eschéete, li dui auront le bail ; et li autres aura la garde, et aura avenant por la garde.

§ 2.

Et tel chose si est de fié partable. Car choses non partables, et non de baronies, de contez, qui sera de deus yues homes, ou home et fame, ou feme et fame pareil, et li deus homes ont le preu, et uns a la garde ; et de trois fréres, li ainznez a la garde. Ne feme ne prent tant com il i ait homme issint près. Et se li frères ainznez est morz, et ai an (eu) l'eenneté, li autre ont le bail yuiement.

§ 3.

Et baill dure dusque vingt-un an, et en feme, à quinze anz. Et mariage tost-il bail ? Nenil, en home ; et en feme, oïl. En roi n'a point de baill, mès il i a garde. Et les issues des choses à celui qui est en baill, sont à celui qui a le bail. Et l'en doit garderles choses dou baill en point.

§ 4.

Quiconques reçoit bail, il le reçoit atot son fès ; et tot doie le menor, cil qui prent le bail paie les detes ; et quant le menor viant à àge, il s'en vet o ses choses toz quites.

Autrement vet dou vilenages : tant com li pères et la mère se tient de marier, tant ont de bail ; et quant il se marient, si faut le bail, et sont comme compoignon, por quoi lor biens soent acompoignez à lors ; autrement non.

§ 5.

[p. 222] Puis que la chose passe à autre que à la mère et au père, bail faut ; mes garde ne faut pas, ainz doit avoir li plus près la garde de l'enfant.

§ 6.

Or demende l'en en desvé, ou en home qui ne set qui se fet, ou en malade qui ait maladie perpétuel, savoir s'il i a bau ? Et l'en dit que non ; mes il i a garde, et li profiz de toz ses biens sont séant.